I-Orlando Pirates izozwana amandla nelilungiselela iChan

I-Orlando Pirates isithole elinye ithuba lokuzihlola ukuthi isikuliphi izinga ngaphambi kokuqala kwesizini entsha.

Kuvela ukuthi leli qembu elisanda kubuya ekhempini yaseSpain lizizwana amandla nelinye lamazwe azodlala kwiCaf African Nations Championship (Chan) ngenyanga ezayo.

Ngesikhathi iseSpain i-Olrnado Pirates idlale imidlalo emine esezingeni eliphezulu yokuzilungiselela – yanqoba owodwa, yahlulwa kowodwa, yadlala ngokulingana emibili. 

Manje njengoba seyibuyile, isemalungiselweni okugcina okuqala umkhankaso wokuvikela iMTN8 ozoqala ngo-Agasti 2 e-Orlando Stadium.

Kodwa ngaphambi kwalokho, ngoMgqibelo iPirates izozwana amandla neqembu lesizwe lase-Angola emdlalweni wokuqinisana.

Lona akuwona nje umdlalo wombukiso, kodwa ngumdlalo womabili amaqembu azowusebenzisela ukuzihlola okokugcina ngaphambi kokuqala kwemiqhudelwano azodlala kuyo ngokwehlukana. Njengamanje iqembu lase-Angola libambe ikhempu yalo yokuzilolonga eNingizimu Afrika njengoba lilungiselela iChan.

Kumqeqeshi we-Angola, uPedro Gonçalves, lo mdlalo nelinye lamaqembu ahlonishwa kakhulu e-Afrika uyithuba elihle lokufasa amabhawodi axegayo.

Uzophinde ahlole isimo seqembu lakhe ngaphambi kokuthi kuqale le midlalo yezwekazi akahlose ukuyinqoba.

Lo mqhudelwano uzoqala ngo-Agasti 2 uze uphothulwe ngo-Agasti 30 kanti uzobanjelwa emazweni amathathu – iKenya, i-Uganda neTanzania. 

• FUNDA NALA | UMolefi Ntseki usekikhiphile ibutho aya nalo empini yeChan

I-Orlando Pirates yona izobe izifudumezela umdlalo weMTN8 ezobhekana kuwo nePolokwane City e-Orlando Stadium ngo-Agasti 2. 

Lo mdlalo ungelinye ithuba kumqeqeshi wayo omusha u-Abdeslam Ouaddou ukuthi ahlole iqembu azoqala ngalo owePolokwane City.

• COFA LAPHA: | Usijoyine kuFacebook

Njengoba i-Orlando Pirates itheze abadlali abasha abaningi, lukhulu olubhekwe ku-Ouaddou kanti lo mdlalo wokuqala uzonika abalandeli okungase bakulindele ngesizini ezayo. 

WINA! GCWALISA IFOMU NGEZANSI UZIWINELE IJEZI LEQEMBU LAKHO