IChiefs ezingxoxweni nomdlali waseZimbabwe
I-Kaizer Chiefs isezingxoxweni nomdlali wasesiswini odabuka eZimbabwe, futhi kuthiwa zingase ziphothulwe noma nini.
Kuthiwa sekusele izinto ezimbalwa kuphela okufanele zilungiswe ngaphambi kokuba lesi sivumelwano siphothulwe ngokusemthethweni.
Lo mdlali, uJonah Fabisch usefikile eNingizimu Afrika njengoba etheleke ngoLwesithathu ezoqedela izingxoxo zokugcina neChiefs.
Lo mdlali oneminyaka engu-24 ubudala usedlale iminyaka eminingi ephesheya kwezilwandle, ikakhulukazi eGermany, lapho athuthukise khona ikhono lakhe.
Wake wadlalela iqembu laseGermany iHamburger SV II ngaphambi kokuthi aqhubekele kwamanye amakilabhu ase-Europe.
UFabisch waziwa ngokusebenza kanzima enkundleni, ukuphasa kahle ibhola nokulawula umdlalo esiswini.
Useke wamela iqembu lesizwe laseZimbabwe emidlalweni yamazwe ngamazwe.
Uma lesi sivumelwano siphothulwa, uzoba umdlali wesibili wasesiswini osayinwe yi-Kaizer Chiefs ezinsukwini ezimbalwa.
Ekuqaleni kwaleli sonto, Amakhosi amemezele ngokusemthethweni ukusayina umdlali waseTanzania, u-Adolf Mtasingwa, oqhamuka kwi-Azam FC.
Bobabili badlala endaweni efanayo esiswini futhi kulindeleke ukuthi baqhudelane noLebohang Maboe, Nkosingiphile Ngcobo noSibongiseni Mthethwa ukuze bathole indawo eqenjini eliqala umdlalo.
Kuyacaca ukuthi iChiefs izimisele ukuqinisa indawo yasesiswini ngaphambi kokuqala kwesizini entsha yeBetway Premiership.
Yize leli qembu lingakakhiphi isimemezelo esisemthethweni, zonke izinkomba zikhomba ukuthi sekusondele ukuthi isivumelwano siphothulwe.
- FUNDA NALA | UZwane uveza okumenze azinze kuMaZulu
Ukubonakala kukaFabisch e-OR Tambo kuqinise imibiko yokuthi sekusele isikhathi nje ngaphambi kokumenyezelwa kwakhe yi-Kaizer Chiefs.
Uma kungaveli izinkinga ngomzuzu wokugcina, lo mdlali waseZimbabwe uzoba ngomunye wabasayinwa yiChiefs njengoba iqhubeka nokwakha iqembu elizobhekana nesizini ka-2026/27.
- EZISHISAYO|Â Cofa lapha usithole kuWhatsApp
