I-Arrows ishwebise iGalaxy isithembile kwiCarling Cup
Uqhubekile umgqigqo omuhle weGolden Arrows njengoba seyingene emaqenjini ayisishiyagalombili asele kwiCarling Knockout.
Leli qembu elicinjwa uManqoba Mngqithi lichilizele eceleni iTS Galaxy, liyishaya ngo 2-1 emdlalweni obuseKing Zwelithini Stadium ngeSonto ntambama.
I-Arrows izithole seyilandela ngemuva ngasekuqaleni komdlalo ngemuva kokuthi uSiphesihle Maduna ebeke phambili iGalaxy.
Nokho Abafana Bes’thende babuyile ngaphambi kokuthi kuyiwe ekhefini ngegoli elibe yisipho sesitobha seGalaxy uSphiwe Mahlangu olishaye ngakubo.
Esiwombeni sesibili zigijimisane zaze zabukana ingekho efuna ukugoba uphondo, kwabe sekuyiwa esikhathini esengeziwe.
Cishe womabili amaqembu – ikakhulukazi iGalaxy – abesebona ukuthi sekuyoze kuyogotshwana inkani phansi kwepali.
Kodwa ke u-Ayabulela Maxwele ube nomunye umqondo, wakhumbula ukuthi amaphenathi afana nelotho, wanqobisa i-Arrows.
Abafana Bes’thende balandele omakhelwane babo esifundazweni iRichards Bay emzuliswaneni olandelayo kulo mqhudelwano.
Amanye amaqembu amabili azobajoyina kulesi sigaba azophuma ngesonto elizayo njengoba bekunemidlalo yeCaf kule mpelasonto.
FUNDA NALA | IChiefs neStellies baya kwesamaqoqo kwiConfed Cup
I-Orlando Pirates izobhekana neMagesi FC ngoLwesibili ukukhipha elesithathu eliya kweyandulela owamanqamu.
NgoLwesithathu iStellenbosch FC izovakashela iMarumo Gallants la kuzophuma khona elesine njengoba lo mqhudelwano usubheke ngasekupheleni.
