I-Arrows iqinisa ebhentshini ngobekwiDowns – ilaxaze onozinti
Umqeqeshi weGolden Arrows, uManqoba Mngqithi, akachithanga sikhathi njengoba eseqalile ukubumba kabusha iqembu lakhe.
Izinhlelo zokulungiselela isizini entsha kuleli qembu laseThekwini seziqalile.
Ngemuva kothwala kanzima nokusinda ezembeni kule sizini, le kilabhu izimisele ngokugwema isimo esifanayo kulokhu.
NoMngqithi usefunge wagomela ukuthi uzokwenza leli qembu elizinze eThekwini libuyele ekubeni ngelinye lenza kahle.
Ngenhloso ecacile, i-Arrows isiqalile ukuchitha abadlali engasabadingi, nokusayina ezoqinisa ngabo isikwati sayo.
Kubadlali asebechithiwe kukhona uKagiso Malinga, uSifiso Mlunguna, uNkosi Gumede, uRyan Moon noPuleng Tlolane.
Lokhu kuchithwa kwalaba kuphawula ukuqala kokulungiswa okubanzi okulindeleke ukuthi kuqhubeke njengoba izinhlelo zesizini entsha ziqhubeka.
Ngasohlangothini lwabaqeqeshi, kuvela ukuthi uYardaan Valodia usendleleni ebheke kwi-Arrows ngemuva kokushiya kwiMamelodi Sundowns.
Ukufika kwalo mhlaziyi kulindeleke ukuthi kulethe ulwazi olubanzi lokucutshungulwa okujulile kwamaqhinga nokuthatha izinqumo ngokubheka izibalo zabadlali.
UValodia noMngqithi bake basebenza bonke kwiMamelodi Sundowns ngaphambi kokuthi lo mqeqeshi achithwe maphakathi nesizini.
Mayelana nabadlali abasha abasayiniwe, umdlali wasesiswini waseMalawi uYankho Singo kuthiwa usendleleni ebheke eThekwini.
Lo mdlali oneminyaka engu-25 ubudala ubedlala ezinkunzini zaseMalawi, iBig Bullets kanti kuthiwa usezingeni elihle.
Ukubuyela kukaMngqithi esikhundleni sokuqeqesha kuleli qembu lePremiership kuqubule isasasa — kanti kulindelwe lukhulu kuye.
Ngemuva kokulivikisa izembe, manje uMngqithi unombono ocacile wokwakha iqembu elingeke liphenduke isigubhu seZayoni.
Ngaphansi kobuholi bukaMngqithi, Abafana Bes’thende kulindeleke ukuthi balwele ukuqeda kwiTop 8 ngesizini ezayo.
