Ezintsha ngamathikithi edabhi yaseSoweto
Amathikithi omdlalo womkhya obhekwe ngabomvu, idabhi yaseSoweto ozoba phakathi kwe-Orlando Pirates neKaizer Chiefs asedayiswe aphela wonke.
IPirates, engosokhaya, ikuqinisekisile ukuthi wonke amathikithi alo mdlalo ozoba seFNB Stadium ngoFebhuari 1 asephelile.
NgoLwesihlanu, bekusele amathikithi angu-15 000. Kodwa ogoMgqibelo ekuseni, iPirates imemezele ukuthi asedayiswe wonke aphela.
Indlela iPirates eyiqale kahle ngayo iligi, idlala ibhola elihehayo futhi eliwinayokungenzeka ibe nomthelela ekutheni lamathikithi adayise kuhle kwamagqinya ebusika.
Isendaweni yesibili kwilogi yeBetway Premiership ngamaphuzu angu-27 emidlalweni engu-11, ilandela iMamelodi Sundowns ngamaphuzu amathathu.
IChiefs okwayo kuhlukile. Ihlezi endaweni yesithupha ngamaphuzu angu-18 emidlalweni engu-13, isele ngamaphuzu ayisishiyagalolunye kwiPirates.
IPirates inqobe amadabhi akamuva njengoba kukhonye yona kwamathathu adlule, okuhlanganisa nomdlalo owandulela owamanqamu kwiNedbank Cup ka-2023.
Lena kuzoba yidabhi ka-181. IChiefs ihamba phambili ngokunqoba kulo mdlalo ongomkhulukazi ebholeni lakuleli.
Isiwunqobe amahlandla angu-74, kanti iPirates yona isalale ijabule amahlandla angu-47.
Imidlalo engu-54 iphele zibambene kanti emihlanu yagcina ingaqedwanga.
IChiefs isishaye amagoli angu-230, kwathi iPirates yavalela phakathi angu-196.
Ngaphambi kwalo mdlalo omkhulu, iPirates izodlala imidlalo emithathu.
Izobhekenane-Al Ahly kwicaf Champions League eCairo ngoMgqibelo ebusuku.
Izobe seyibuyela kuleli, bese idlulela eMgungundlovu iyibhekana neRoyal AM ngoLwesine eHarry Gwala Stadium.
NgoJanuwari 26, iyobe seyivakashela iRichards Bay eThekwini emdlalweni weNedbank Cup.
