BUKA: Unozinti waseKenya ehlazweni lokupheka imidlalo
Ibhola laseKenya lisehlazweni kulandela ukuputshuka kwevidiyo okusolwa ukuthi ixhumanisa owayengunozinti weqembu lesizwe lase-Kenya, uPatrick Matasi nokuphekwa kwemiphumela yemidlalo.
Le vidiyo, esisabalele ezinkundeni zokuxhumana, ikhombisa uMatasi elalele futhi enqekuzisa ikhanda sakuvuma ngesikhathi othile emyalela okumele akwenze.
UMatasi, osanda kuhlukana ne-Kenya Police FC ngaphansi kwezimo ezingacacile, useke wadlalela iTusker FC, i-AFC Leopards, neSaint Georges FC yase-Ethiopia.
Umdlalo wakhe wokugcina kwiHarambee Stars kwaba wukuhlulwa kabuhlungu yiCameroon ngo 4-1, lapho angenelwa khona yigoli lesine elisolisayo.
Lokhu kuhlulwa kwalimaza kakhulu amathuba e-Kenya okungena kwi-Africa Cup of Nations futhi ngokushesha kwalandelwa ukwesula komqeqeshi u-Engin Firat.
Izinkundla zokuxhumana zishukumile ngemuva kokuvela kwale vidiyo. Abalandeli bazwakalise ukuphoxeka kwabo.
U-Afande Cele ubhale kuFacebook wathi: “Kubuhlungu kakhulu kulabo abasebenza kanzima ukubona ibhola lethu likhula.
“Besihlale siqagela, kodwa manje sinobufakazi… Lokhu kusika kakhuulu.
“Esiwombeni sokuqala, yenza siphele zisabambene… kwesesibili, dedela igoli… eeeihh.”
Imininingwane mayelana nesikhathi sevidiyo nalo wesilisa othembisa lo nozinti ukumkhokhela ngokwenza amyalela khona ayikacaci.
U-Ombija Oguda ubuze ukuthi uMatasi, ngesikhathi edlalela iqembu likahulumeni iKenya Police FC — neqembu lesizwe, kwenzeka kanjani angabanjwa.
“Ngeke ngikwamukele kalula kanjalo nje lokhu. Ubetshaliwe lo yilabo abalawula ibhola eKenya.”
Umqeqeshi ongumakadebona uFrank Ouna wengeze wathi: “Ngibone amagoli abengena ngaphansi kwezimo ezixakile.
“Ngemuva kokubuka le vidiyo namuhla, izinto seziqala ukucaca.”
Le vidiyo yobufakazi bokuphekwa kwemidlalo sekususe ukukhathazeka ebholeni laseKenya.
Iziphathimandla zingaphansi kwengcindezi yokuthi ziphenye futhi zibuyisele ukwethembeka kwezemidlalo. Buka le vidiyo ngezansi:
