Yini engahambi kahle kwiKaizer Chiefs?
IKaizer Chiefs idonsa kanzima ekuvaleni emuva, uwodwa kuphela umdlalo engangenelwanga goli kuwo kuyona yonke esayidlalile kuze kube manje kule sizini.
Lokhu sekuholele ekutheni kubuke imibuzo mayelana nokuthi kanti yini le edala izinkinga ezingaka emuva.
Okokuqala, sonke siyazi ukuthi udonga lwasemuva oluqinile luyisisekelo sokwakha kabusha iqembu.
Abaqeqeshi abafana noJose Riveiro, ngesikhathi ejoyina i-Orlando Pirates, bakubeke eqhulwini ukuzinza kweqembu emuva.
URiveiro uqinise udonga lwasemuva ngokusayinisa abadlali abafana noNkosinathi Sibisi noTapelo Xoki abebengabaholi emaqenjini abo adlule.
Ukugxila kwakhe ekuqiniseni ukuzivikela, kumkhiphele imiphumela emihle zisuka nje.
Ngesikhathi uNasreddine Nabi ejoyina iChiefs, naye waveza isidingo sokuthuthukisa nokuqinisa udonga lwasemuva.
Iqembu lisayinise u-Inacio Miguel noRushine Dortley ukulungisa izindawo ezimaphakathi emuva.
Nokho lihlulekile wukuthola abadlali basemuva abamqoka abanekhono nokuzethemba ukubhekana nengcindezi yokudlalela iKaizer Chiefs.
IChiefs iphuthelwe abadlali basemuva kwesokunxele ebibafuna njengo-Anderson Cruz, uFawaaz Basadien, noRiaan Hanamub.
Futhi ize yagcina seyikhalela koBradly Cross noBongani Sam oneshwa lokuthandwa wukulimala.
Ngakwesokudla emuva, ayikwazanga ukuthola uThabang Matuludi, okuyishiye ithembele kuReeve Frosler onezinsuku zakhe, noDillon Solomons ovame ukulimala.
Isakhiwo seqembu kube yinkinga. Ekuqaleni, uBradley Cross ubengena ngaphakathi, bakhe udonga lwamadoda amathathu, kunyuka uFrosler ukuyosiza ukuhlasela.
Ngalesi sikhathi bekudlala uYusuf Maart noSamkelo Zwane esiswini maphakathi nenkundla.
Nokho kuthe uma uSibongiseni Mthethwa eseqala ukudlala maphakathi nenkundla, uCross waphoqeleka ukuthi naye anyuke ayosiza ekuhlaseleni.
Lokhu kububeke obala ubuthuntu bakhe. Izimbangi zisheshe zakufunda lokhu, zabe sezihlasela kakhulu ngasohlangothini lwakhe.
Lokhu kumshiya ebhekene nendoda ngqo, okuyinto angayijwayele neyenza ahluleke wukuchitha iminyakazo yezitha.
UNabi uphinde wehluleka ukuhlanganisa isisu esiqinile, esizokwazi ukuvikela udonga lwasemuva.
Ukugxila ekuhlaseleni kushiye udonga lwasemuva luvulelekile esitheni.
IChiefs isakwaze ukuqeda umdlalo owodwa vo ingangenelwanga goli kuyo yonke imiqhudelwano kule sizini.
Lokhu kugqamisa ngokusobala isidingo sokuthi kuqiniswe udonga lwasemuva, yize abaningi besola konozinti nakubagadli.
