UZakhele Lepasa ubhoboka ngubuhlungu abhekane nabo elimele
Obayengumgadli we-Orlando Pirates, uZakhele Lepasa, useveze ukuthi ubesengabaza ukuthi ngabe uyoke afinyelele yini ezingeni abelifisa ngomsebenzi wakhe webhola.
Lokhu bekulandela ukuxinwa wukulimala okumhlalisa ngaphandle isikhathi eside kulamasizini ambalwa edlule.
UZakhele Lepasa akazange adlale nowodwa umdlalo kwi-Orlando Pirates ngesizini edlule ngenxa yokulimala okumenze wangalithinta ibhola isikhathi eside.
Usekhulume ngendlela aqale ngayo ukungabaza ukuthi ngabe angaphinde abuyele yini ekudlaleni njengoba ebeelwela ukubuyela esimweni.
“Ngicabanga ukuthi into eyodwa engasho lukhulu kimina wukuzibona ngisenkundleni ngigqoke ijezi lebhola, ngidlale imizuzu embalwa yokuqala yesizini.
“Yileyo mina into engiyibheke ngabomvu njengamanje,” kusho uLepasa kwiSABC Sport.
“Angizange ngidlale isizini yonke edlule ngenxa yokulimala… Ngike ngalimala isikhathi eside phambilini kodwa akuzange kuzwele ngendlela efanayo.
“Kulokhu kokuqala ngalimala kunguDisemba ngaze ngabuya ngoDisemba olandelayo,” kuqhuba yena.
Uthe yize lokhu kwakungunyaka wonke, kodwa akanakanga kakhulu ngoba wayelimale isizini imaphakathi, wabe esebuya seyimaphakathi elandelayo.
“Yingakho ngingazange ngizizwe sengathi ngiphuthwe yisizini yonke ngalesiya sikhathi futhi kimina bekungokokuqala ukuthi lokhu kwenzeke.
“Kugcine sekuletha ukungabaza okukhulu ngomsebenzini wami webhola.
“Kungenze ngaba nokungabaza okukhulu empilweni yami mayelana nokuthi ngisangaphinda yini ngibuye ngenze engingakwenza kangcono kakhulu.
“Nokuthi ngisangakwazi ukuphinde ngibuyele eqenjini lesizwe, ngifeze izinhloso engizibekele zona ebholeni.
“Kodwa ke ubuhlungu engidlule kubo bungenze ngakulambela kakhulu ukubuyela ekudlaleni ngifeze izinhloso zami.
“Ukuzidela obekumele ngikwenze ngonyaka owodwa, ukuze ngizithole sengidlala ibhola futhi kungenze ngakulambela ukudlala.”
UZakhele Lepasa ukhululwe yi-Orlando Pirates ngokusemthethweni kuleli sonto, okuqede iminyaka emihlanu ekuleli qembu laseSoweto.
Nokho ube eseqokelwa eqenjini laseNingizimu Afrika elizodlala kwi-Africa Nations Championship (Chan) lapho ebheke khona ukuzethula kabusha ebholeni.
“Okuhlekisayo ngeChan wukuthi singabadlali uma sidlala njalo emaqenjini ethu siyithatha kancane…
“Kodwa uma leli thuba lifike usesimweni lapho unesikhathi wagcina ukudlala uyaqonda ukuthi ubaluleke kangakanani lo mqhudelwano,” kwengeza yena.
“Manje kubaluleke njengokuya kwiBafana Bafana ukuyodlala imidlalo yokuhlunga bese uyodlala kwi-Afcon nanoma yimiphi eminye imidlalo.”
Uthe uzimiseke ukwenza kahle kulo mqhudelwano, bese ebona ukuthi kwenzakalani ngemuva kwawo.
Nokho kungenzeka agcine ehoxa kuwo njengoba kuvela ukuthi kunamaqembu afisa ukumsayina nje okukhona kuwo iSiwelele FC, AmaZulu FC neChippa United.
