UYeye uqala ukuqeqesha ngokuzimele eBotswana
Ingwazi yeKaizer Chiefs neBafana Bafana uReneilwe “Yeye” Letsholonyane usevuke ngomsebenzi wokuba ngumqeqeshi omusha weqembu leBotswana FNB Premiership iMatebele FC.
Ngokwemithombo esondelene nezingxoxo, lo mqeqeshi oneminyaka engu-43 ubudala usayine inkontileka yeminyaka emibili.
Lokhu kuphawula indima yakhe yokuqala yokuba ngumqeqeshe oyinhloko.
ULetsholonyane, ophethe oneCaf A License, unolwazi olunzulu kwezokuqeqesha njengoba eseke waba yingxenye yethimba labaqeqeshi beqembu lesizwe laseNingizimu Afrika labaneminyaka engaphansi kuka-20.
Uphinde wasebenza emiqhudelwaneni yeCosafa Cup neChan neqembu leBafaba Bafana.
Uke wasebenza nasezinhlakeni zeDStv Diski Challenge kuMaZulu FC, ezakhela igama njengomqeqeshi osemncane.
Lo mqeqeshi ongowokuzalwa eSoweto uzojoyina u-Owen Da Gama waseNingizimu Afrika kwiPremiership yaseBotswana.
Njengamanje uDa Gama uphethe iBlack Lions. Ngokuqondana kwezinto, umdlalo wokuqala kaLetsholonyane ephethe uzobhekana noDa Gama.
IMatebele, esanda kunqoba okokuqala kule sizini ishaya iMorupule Wanderers ngo-6-2, okwamanje isendaweni yeshumi kwilogi.
FUNDA NALA | UNkota uveza okwenze washeshe wavelela kwi-Al-Ettifaq
Lokhu kungemuva kokuvula umkhankaso ngokuhlulwa kabili. Izikhulu zeqembu zinethemba lokuthi ubuholi bukaLetsholonyane buzosimamisa iqembu.
KuYeye, lokhu kuphawula isahluko esisha esijabulisayo emsebenzini wakhe wangemva kokudlala, njengoba engena ekubeni ngumqeqeshi ozimele.
