Uthi yobe kubalandeli uNabi ngehlazo leDowns
- Intatheli yeLISENETHINI
Umqeqeshi weKaizer Chiefs, uNasreddine Nabi, usexolisile kubalandeli baleli qembu ngokuhlulwa kwabo ngo 4-0 bedlala neMamelodi Sundowns kwiCarling Knockout.
IChiefs isizoqeda iminyaka engu-10 ingenayo indebe kulandela lokhu kuhlulwa.
Ngemuva kokubuka iqembu lakhe lihujiswa izithunzi ngendlela exakile enkundleni, uNabi uthembise abalandeli ukuthi ngeke baphinde babuke umbozo onjeya.
“Kumele ngihalalisele imbangi yethu, sikholwa wukuthi kuyifanele ukunqoba,” kusho uNabi.
“Okwesibili, ngingathanda ukuxolisa kubalandeli bethu ngoba namuhla besingebahle nganoma iyiphi indlela.
“Ngalokho siyaxolisa kubalandeli bethu abaphansi ngenxa yalo mphumela kodwa singabathembisa ukuthi sizosebenza kanzima ukwenza iqembu libe ngcono.
“Besazi ukuthi iqembu belingakafiki ezingeni abantu abebelingacabangela kuyo kodwa namuhla kube yingozi esikholelwa ukuthi ngeke iphinde yenzeke esikhathini esizayo.”
Ngasekuqaleni kwaleli sonto, uNabi ubephinde wavuma ukuthi iqembu lakhe lisekude nokuba yilento ayihlosile.
Uthe abakafiki ezingeni la sekungalindelwa ukuthi baqale ukuqoqa izindebe njengoba iqembu lisabunjwa nje.
Kuvelile ke lokho njengoba behlulekile wukumelana nengcindezi phambi kwabalandeli abebebalelwa ku-85 000 eFNB Stadium.
“Ngiyavuma ukuthi abadlali bebengekho ezingeni ezilfanele kodwa umthwalo walo mphumela ngowami njengomqeqeshi.
“Ngizozibophezela ngokugcwele ngalo mphumela ngoba angifuni ukugxeka abadlali bami phambi kwabezindaba kodwa ngizokwenza ngaphakathi sesisodwa,” kusho lo mqeqeshi.
“Wonke umuntu uzozibophezela kodwa ngikholwa wukuthi kuyiqiniso ukuthi abazange benze kahle ngoba ngasekuqaleni komdlalo bebethukile.
“Amaphasi amaningi abengayo la kufanele khona, amabhola amaningi siwalahlile, njalo njalo.”
