UThabo Mngomeni udidekile kuduka umfowabo uThando
Ingwazi ye-Orlando Pirates, uThabo Mngomeni, ithi imangele ngemuva kokuzwa ezinkundleni zokuxhumana ukuthi umfowabo omncane, uThando Mngomeni, ulahlekile.
Ngokwemilayezo efakwe ezinkundleni zokuxhumana, abasondelene naye befuna ukufuniswa yena, uThando Mngomeni waduka maphakathi noJuni.
UThando, owayengumdlali wasesiswini kwiBidvest Wits neBafana Bafana, kubikwa uvele wanyamalala.
Umakhalekhukhwini wakhe kuthiwa uvele ukufake lapho othi kumele umshiyele umlayezo uma uwufonela.
Amalungu omndeni ashaqekile futhi aseqala ukuba nezinsolo eziningi ngokuduka kwakhe.
“Ngithole osukwini noma ezimbili ezidlule lapho othile engithumelele umlayezo ofakwe ezinkundleni zokuxhumana ngaye,” usho kanjeuThabo Mngomeni kwiKickOff.
“Ngisazama ukuthola umfowethu ukuthi ushonephi. Siphila izimpilo ezihlukene, ngakho-ke lokhu kungithole ngingalindele.”
UThabo Mngomeni uthi lesi simo siyadida — ikakhulukazi ngoba ulwazi aluthola entombini kaThando luyajikajika.
“Ungitshela ukuthi uThando uphephile lapho ekhona,” kuqhuba uThabo Mngomeni.
“Ngibe sengimcela ukuthi amthsele angishayele ukuze ngizwe izwi lakhe. Kodwa kuze kube manje ngisebumnyameni.
“Angazi noma amaphoyisa asazisiwe yini ngokusemthethweni ngokunyamalala kwakhe.”
Uphinde wabuza ukuthi kungani benqume ukufaka ezinkundleni zokuxhumana ukuthi ulahlekile ngaphambi kokukubika emaphoyiseni.
“Mhlawumbe kube khona ukungaboni ngaso linye okuncane kuye nentombi, futhi icabanga ukuthi uzobuya.
- FUNDA NALA | Obezinze phesheya uvuma izingxoxo nesifiso anaso ngeChiefs
“Yibo bobabili kuphela abahlala ekhaya njengamanje. Ngisalinde ukuthi aphinde angithinte angivumele ngikhulume naye ngqo.”
I-Unplayable yona ibika ukuthi umfowabo uLunga Mamputa, ozibize ngomzala kaThando, uthe nabo basamthungatha ngoba abazi ushonephi.
“Sicela abangaba nolwazi noma abake bambona basithinte,” kusho uMamputa. Uthe inombolo yakhe ikule-poster engezansi.
