Uqophe umlando ongemuhle neze uBongani Sam kwiChiefs
IKaizer Chiefs isihlukane ngokusemthethweni noBongani Sam, okuvala isahluko esingesihle neze kuye naseqenjini.
Lo mdlali wasemuva oneminyaka engu-27 ubudala ushiya iNaturena ngaphandle kokudlala nowodwa umdlalo osemthethweni kwiGlamour Boys.
U-Bongani Sam ube ngumdlali wesithupha okhonjwe indlela njengoba iKaizer Chiefs ihlela kabusha isikwati sayo ngaphansi komqeqeshi uNasreddine Nabi.
IKaizer Chiefs iphinde yaqinisekisa ukuphuma kuka-Edmilson Dove noRanga Chivaviro, izinkontileka zabo eziphelelwe yisikhathi.
OMduduzi Mdantsane noSabelo Radebe bona eabo zinqanyuliwe njengoba bebengasadingeki eqenjini.
UNjabulo Blom yena ubuyele eqenjini lakhe le-MLS, iSt Louis City ngemuva kokuphela kwesivumelwano sokubolekiswa kwakhe.
Ukusayina kuka-Bongani Sam kwiKaizer Chiefs ngonyaka odlule kwamangaza abaningi zisuka nje.
Ubevele engasalazi ijezi kusukela kwabheda izinto waxoshwa kwiMoroka Swallows, i-Orlando Pirates yamfaka endalini.
Futhi naphezu kokusayina isivumelwano seminyaka emithathu emombandela wokwengeza okumnye kwiChiefs, akazange abe ngumdlali omqoka eqenjini.
KwiChiefs ubeshaywa indiva nje kanti ngisho esedlale kahle eqenjini leBafana Bafana ebelidlala eyokuhlunga yeChan ngoMashi akuzange usize.
Ngisho nangesikhathi iKaizer Chiefs ilinyalelwe abadlali basemuva kwesokunxele, uBongani Sam akazange anikwe ithuba.
IChiefs esikhundleni salokho ijike abadlali basemuva maphakathi oBradley Cross no-Aden McCarthy yabadlalisa kweskunxele.
Lokhu kube wuphawu olucacile lokuthi uSam ubengeyona ingxenye yezinhlelo zikaNabi ukuya phambili.
Ngokombiko weFARPost, uSam akazange afike ukuzoqala amalungiselelo esizini entsha ngesikhathi iqembu libuyela ejimini ngoLwesihlanu olwedlule.
Lokhu kuqinisekise ukuthi izinto ziyambhedela, futhi akaseyna ingxenye yezinhlelo zeqembu.
Futhi njengoba uPaseka Mako noNkanyiso Shinga beseqenjini, yibo abazobanga indawo yasemuva kwesokunxele.
Khonamanjalo, iChiefs isaqhubeka nokuvuselela isikwati njengoba u-Ethan Chislett, Flavio Silva, noThabiso Monyane sebeqalile ukuzilolonga eNaturena.
U-Etiosa Ighodaro noSiphesihle Ndlovu nabo kulindeleke ukuthi bajoyine maduze, njengoba lezi ziqhwaga zaseSoweto zihlela ukubuya ngamandla emkhankasweni ka-2025/26.
