Uqinise isitolobho uBroos eqoka eleBafana

• Sibongiseni GUMBI

UTshegofatso Mabasa ubuyile njengoba umqeqeshi weBafana Bafana uHugo Broos ememezele isikwati sabadlali abangu-32. 

IBafana izilungiselela imidlalo emibili ebalulekile kweyokuhlungela i-Africa Cup of Nations (Afcon) ka-2025. 

Iqembu lesizwe lizobhekana neCongo labili, ekhaya nasekuhambeni ngenyanga ezayo. 

Umdlalo wokuqala uzodlalelwa eNelson Mandela Bay Stadium eGqeberha ngo-Okthoba 11 ngo-7 ebusuku. 

Ezinsukwini ezine ukusuka lapho, ngo-Okthoba 15, iBafana izoya eCongo lapho izodlala khona e-Stade Alphonse Massemba-Débat, emdlalweni oqala ngo-6 ntambama (ngokwesikhathi sakuleli).

Le midlalo ibalulekile kwiNingizimu Afrika. Iyithuba leBafana lokuqinisa amathuba ayo okungena kwi-Afcon.

I-Afcon elandelayo izosingathwa e-Morocco kusukela ngoDisemba 21 kuya kumhla kuJanuwari 18 ka-2026. 

Iqembu liya kule midlalo linomfutho, lithole amaphuzu amane emidlalweni emibili yokuqala yokuhlunga. 

Idlale ngokulingana ngo 2-2 ne-Uganda yabe seyinqoba umdlalo owawumnandi ngo 3-2 bedlala neSouth Sudan.

UBroos uyakuqonda ukubaluleka kwale midlalo yokuhlunga. 

Ukukhethwa kweqembu lakhe kukhombisa isu lokubhekana neCongo. 

Wonke amaphuzu abalulekile kulo mqhudelwano onzima. 

Okubalulekile okungeziwe eqenjini ukubuya kukakaputeni weBafana uRonwen Williams. 

UWilliams uphuthelwe ukubizwa ngenxa yokuhlinzwa ehlombe. 

Manje useluleme ngokuphelele, futhi usedlalile eqenjini lakhe lakhe iMamelodi Sundowns.

UBroos uyazi ukuthi uWilliams ubaluleke kangakanani eqenjini. 

Ukushoda kobuholi balo nozinti oneminyaka engu-32 ubudala nesipiliyoni sakhe emidlalweni edlule kucace bha. 

Ngaphandle kukaWilliams, baningi abanye abadlali ababuyiseliwe eqenjini. 

Kubo kubalwa uBradley Cross weKaizer Chiefs, uThabiso Sesane noTshegofatso Mabasa be-Orlando Pirates, uLuke Le Roux we-IFK Värnamo yaseSweden, uSinoxolo Kwayiba weChippa United, uPercy Tau we-Al Ahly, noDevin Titus weStellenbosch FC.

UBroos uzonciphisa iqembu libe ngelabadlali abangu-23 ngesonto elizayo. 

Iqembu lokugcina lizomenyezelwa ngaphambi komnqamulajuqu wangoLwesihlanu. 

Nali iqembu azobe eqoka kulo elokugcina:

Onozinti: Ronwen Williams, Ricardo Goss, Veli Mothwa, Sipho Chaine 

Abasemuva: Nyiko Mobbie, Bradley Cross, Thabiso Morena, Rushwin Dortley, Nkosinathi Sibisi, Aubrey Mudau, Khuliso Mudau, Thabiso Sesane, Fawaaz Basadien, Siyabonga Ngezana, Grant Kekana 

Abadlali basesiswini: Teboho Mokoena, Jayden Adams, Bathusi Aubaas, Sinoxolo Kwayiba, Luke le Roux, Thalente Mbatha 

• OLUNYE UDABA: Ziyemuka nezidindi abebambelele ngazo uMalesela

Abagadli: Tshegofatso Mabasa, Iqraam Rayners, Mihlali Mayambela, Percy Tau, Elias Mokwana, Lyle Foster, Relebohile Mofokeng, Themba Zwane, Devin Titus, Oswin Appollis, Patrick Maswanganyi