UPhalane useyazisola ngokubhampela izinkunzi zaseGauteng
ULantshene Phalane usezivumele ngokwakhe ukuthi uke akangaziphatha ngendlela efanele, wavuma nokuzisola ngokudedela ithuba lokujoyina izinkunzi zaseGauteng.
Lo mdlali wake wadlala ibhola elihle kwiBloemfontein Celtic futhi waheha amehlo eMamelodi Sundowns, i-Orlando Pirates, neKaizer Chiefs.
Kodwa uLantshene Phalane uthi wakugwema ukuthuthela ekilabhini enkulu yaseGauteng, waqnuma ukuhlala kwiBloemfontein Celtic.
Nokho isizathu sakhe siyashaqisa. Wakhetha ukuhlala kwiCeltic ngoba leli qembu laseFree State “lalimboza amanyundululu akhe.”
UPhalane, manje oneminyaka engu-35 ubudala udlala kwiBaroka FC esigabeni seMotsepe Foundation Championship kanti uyavuma ukuthi “unokuzisola”.
Okukhulu kakhulu ekuzisoleni kwakhe wukwenqaba ngesikhathi efunwa eGauteng phakathi kuka-2015 no-2021 lapho lezi zinkunzi zazimfuna.
Kodwa-ke, ugcizelela ukuthi ukuhlala kwiCeltic kwakuyisinqumo esifanele ngaleso sikhathi ngoba le kilabhu yayimqonda, ikufihla okubi akwenzayo.
“Ukusuka kwiCeltic kwakungeke kube yinto enhle ngalesiya sikhathi…
“KwiCeltic babezazi zonke izinkinga zami futhi banamathela kimi,” kusho uPhalane kwiSowetan.
“Ngangingumfana ongaziphethe kahle, kodwa iCeltic yayikufihla lokho.
“Cabanga ke nje ukuba ngiya kwiChiefs noma kwiPirates ngisengumfana ongaziphethe kahle futhi onezinkinga… babengeke bakubekezelele lokho.”
Ukholwa ukuthi ukube wathatheka, wahamba wayojoyina iqembu elikhulu wayezophelelwa wumsebenzi ngemuva kwezinyanga eziyisithupha.
Esikhundleni salokho, kwiCeltic, babazi ukuthi bazobhekana kanjani nezinkinga zakhe.
“Ngakho-ke ngingasho ukuthi kukhona ukuzisola, kodwa ukuzisola engizibongayo ngakho,” kuchaza yena ekhumbula izikhathi athi sezadlula.
Manje njengoba esebuye isibili kwiBaroka, lapho aqala khona ibhola elikhokhelayo ngo-2007, uLantshene Phalane ubona esenendima engaphezulu kokuba ngumdlali.
“Ngibuyile ngoba bengidinga ukubuyisela emuva… yiqembu elingenze umuntu leli,” kuqhuba yena.
Umzimba wakhe usazimisele, kodwa usekulungele ukulengisa amakhokho akhe uma isikhathi sifika.
