UMothwa ‘ukhuthazwa yizinhlamba’ zabalandeli
- Sibongiseni GUMBI
UVeli Mothwa, ongunozinti weMaZulu FC neBafana Bafana, uthi usekudlulisile ukusolwa nokuthukwa akuthola ngemuva kwamaphutha awenzile ezinyangeni ezimbalwa ezidlule.
Lo nozinti wenza amaphutha acishe aqhatha iBafana nenduku ibhekene ne-Uganda emdlalweni omqoka wokuhlungela iCaf Africa Cup of Nations (Afcon).
Waphinde wenza iphutha eladlisela AmaZulu emidlalweni yokuqala yesizini kwiBetway Premiership.
Lokhu kuphethe ngokuthi abekwe eceleni Osuthwini nakwiBafana njengoba ebebukeka edinga isikhathi sokuzilungisa ngokomqondo.
Usekhulume okokuqala nabezindaba ngemuva kwalezi zigameko ngesikhathi ekwi-Extra Time yeGagasi FM ngoMsombuluko.
“Okulindelwe abantu kimi ukuthi ngikusho wukuthi, ‘ngiyaxolisa’,” kusho uMothwa kule ngxoxo yakhe.
“Kodwa akusikhona lokho… Engingakusho manje wukuthi ngizama ngaso sonke isikhathi ukwenza okusemandleni.
“Futhi kuzohlezi kuba nezinsuku ezimbi nezinhle kimi, kodwa ngiyakudinga ukwesekwa abalandeli bebhola eNingizimu Afrika. Yilokho engizokusha.
Ubuzwe ukuthi ngabe ingcindezi efakwa abalandeli nabezindaba kubadlali yimbi ngaleyo ndlela ukuthi iyabathikameza abadlali.
“Ngicabanga ukuthi iyadingeka leyo ngcindezi. Uma ingekho ingcindezi yabalandeli, yini ezongenza ngikhiphe amangwevu?
“Uma ingekho, ngingadlala nje ukugcina icala. Kodwa uma bengifaka umfutho (ngengcindezi)…
“Ngoba uma wenza iphutha – ngisho lingaba linye – bayakuthuka. Kodwa kuncike ekutheni wenza uzitshelani ekhanda lakho.
“Ngabe ugxila kulokho abakuthuka ngakho, noma ujika leyo nhlamba yabo uthi, ‘ungithukile lo muntu, kumele ngisebenze ukuze angaphinde angithuke’,” kusho uMothwa ezihlekela.
“Kufana nabagadli, uma bengalishayanga igoli emdlalweni bayacasuka.
“Uma umbuza ukuthi kungani kwenzeke kanjalo, akhombe omunye umdlali athi akamphaselanga.
“Kodwa ngaphakathi kuye, uthi, ‘uyabona lo, ingitshele udoti, ngokuzayo ngizombonisa ukuthi ngingubani’.
“Kube sekuyadlulwa lapho. Ngicabanga ukuthi nakubalandeli kumele kube kanjalo.
“Uma bekubona uphansi, kumele bakufukule ukuze ubuyele esimweni sakho njengomdlali.
“Akukhona ukuthi sifuna babe ntofontofo kithi nsukuzonke. Abantu baseka amaqembu ngezinhliziyo futhi bakhokha imali ukuzosibuka.
“Ngakho kumele sibakhokhele ngalokho. Ukubakhokhela kwethu wukuthi sidlale ngokuzimisela enkundleni.”
