UMabasa uveza isifiso serekhodi kwi-Orlando Pirates
Umgadli we-Orlando Pirates, uTshegofatso Mabasa, uzibophezele kakhulu kwafuna ukuzuza ngesizini ezayo.
Uhlose ukwephula irekhodi lale kilabhu lokushaya amagoli amaningi ngaphambi kokuthi kuqale i-Africa Cup of Nations ngoDisemba.
Lesi akusona nje isifiso sokuvelela; kodwa yisimemezelo esinesibindi esivela kulo mgadli oneminyaka engu-28 ubudala.
Njengamanje uTshegofatso Mabasa uzishaya isifuba ngamagoli angu-46 emidlalweni engu-167 kuyo yonke imiqhudelwano kwi-Orlando Pirates.
Lokho kumenza asondele kakhulu kumdlali wasesiswini wodumo uBenedict “Tso” Vilakazi oqophe umlando wamagoli angu-52.
Njengamanje amagoli ayisithupha nje kuphela amhlukanisa nokufaka igama lakhe emabhukwini omlando we-Orlando Pirates, futhi uTshegofatso Mabasa usethubeni elihle.
Unqobe iLesley Manyathela Golden Boot ngesizini ka-2023/24 kanti ugcwele ukuzethemba, ikakhulukazi ngemuva kokuhlohla amagoli angu-34 kumasizini amabili edlule.
Ukholwa ukuthi umkhankaso ozayo ka-2025/26 yiwona azokwephula ngawo irekhodi likaVilakazi, bese eqopha elisha.
“Ngibheke ukuba nesizini enkulu kakhulu, futhi ngicabanga ukuthi ngisele ngamagoli angu-10 noma angu-11…
“Ngifuna ukuzuza lelo rekhodi ngaphambi kokuthi kuqale i-Afcon,” kusho uMabasa kwi-iDiski Times, ecacisa izinhloso zakhe zesizini ezayo.
Ngabe uzifakela ingcindezi? UMabasa akasayinaki leyonto. “Angisayizwa ingcindezi,” kuqhuba yena.
“Uma izinto uzikhuluma, kuyenzeka ukuthi zenzeke ngampela, umlomo uyadala,” usho kanje.
Uthe lokhu ukususela ezimfundisweni zikanina owayemtshela ukuthi: “Uma into uyikhuluma ngokwethemba, izokwenzeka.”
FUNDA NALA |
Njengoba i-Orlando Pirates inemidlalo eyisithupha ngo-Agasti, okuhlanganisa emihlanu yeligi nomdlalo wokuvula kwiMTN8, uTshego Mabasa ubona kuyithuba elanele lokufeza isifiso sakhe.
Umsebenzi wakhe oncomekayo wamagoli angu-66 emidlalweni engu-226 emaqenjini ehlukene okuyiPirates, iBloemfontein Celtic, iMoroka Swallows, neSekhukhune United uyazikhulumela.
Kodwa ngabe uTshego Mabasa engakwazi ukufeza lesi sifiso esingaba yingqophamlando, abe ngumshayi magoli ohamba phambili we-Orlando Pirates?
Ngokomgqigqo wakhe kubukeka engakwenza lokho, kodwa ke sekuzobonakala ngokuhamba kwemidlalo ukuthi uyawuqopha yini lo mlando awuhlosile.
