‘Uma emuhle kangako uLucas Ribeiro, akabuyele e-Europe’
Isihlabani seMamelodi Sundowns, uLucas Ribeiro uselulekwe ukuthi asebenzise iFifa Club World Cup ezayo ukukhombisa ithalente lakhe ukuze abuyele e-Europe.
ULucas Ribeiro ujoyine iSundowns esuka eqenjini laseBelgium, iSK Beveren ngoJulayi ka-2023 futhi usephenduke umdlali omkhulu kuleli qembu elizinze eChloorkop.
Njengamanje ungumdlali ohamba phambili kwiBetway Premiership futhi nguyena oshaye amagoli amaningi ngamagoli angu-13 emidlalweni engu-23.
Lo mdlali wasesiswini ohlaselayo odabuka eBrazil unenkontileka kuze kube uJuni ka-2028 naMasandawana kodwa welulekwa ukuthi angahlali kuze kube yileso sikhathi.
Owayengumdlali odabuka eBrazil owake wadlalela iMoroka Swallows phambilini, uVinicious Da Silva, uthi uma emuhle ngendlela abonakala eyiyo, kufanele adlale kwiligi enkulu.
“Izinombolo zakhe zinhle futhi usenqobe izindebe eNingizimu Afrika. Ngicabanga ukuthi kungaba kuhle ukuthi ahambe,” kusho uSilva kwiSNL.com.
“Manje njengoba ezobe edlala kwiClub World Cup, kuyithuba elihle kuyena ukuthi aziveze ukuze ashiye iSundowns.
“Uma emuhle ngendlela anconywa ngayo, kufanele akwazi ukuzibonakalisa kwiClub World Cup futhi akholise umhlaba ukuthi akamuhle eNingizimu Afrika kuphela.”
UDa Silva uthe ukuze uRibeiro acatshangwe eqenjini lesizwe laseBrazil, udinga ukudlala kwiligi enkulu e-Europe.
“Ngiyazi ukuthi imali kwiSundowns yinhle futhi iyalingana neyakumaligi angaphandle kwamahlanu abahamba phambili e-Europe.
“Kodwa udinga ukukhombisa isifiso sokuvelela. Ngike ngadlala eNingizimu Afrika ngasithokozela isikhathi sami khona.
“Kodwa sonke siyazi ukuthi akuyona enye yamaligi ahamba phambili emhlabeni. Ngakho-ke, uRibeiro akabuyele kwiligi ephezulu.”
Kubikwa ukuthi uLucas Ribeiro usevele uhehe isasasa eqenjini leLigue 1 yaseFrance, iLille OSC kodwa isazovela kwiSundowns nesicelo sokudayiselwa yena.
