UDoctor Khumalo weseka uRulani Mokwena ‘okudlalwa ngaye’
URulani Mokwena usethole ukwesekwa yinkakha yeKaizer Chiefs neeBafana Bafana u-Doctor Khumalo ngemuva kwesiqephu sakamuva kwiWydad Athletic.
IWydad Athletic inikeze uRulani Mokwena ikhefu eliyisipesheli kuze kuphele isizini nakuba sekusele imidlalo emithathu isongwe.
Kukholakala ukuthi indlela abephethwe ngayo bekuhloswe ngayo ukumphoqa ukuthi azihambele ukuze angayitholi inkokhelo yakhe.
Inkontileka yakhe inesigatshana esichaza ukuthi uma leli qembu limxosha, kumele limkhokhele imali elinganiselwa ku-R18 million.
Manje u-Doctor Khumalo usephumele obala, wagxeka okwenzeke kuRulani Mokwena futhi wamvikela.
IWydad isanda kumemezela ukuthi uMokwena uzolishiya leli qembu ekupheleni kwesizini.
Ufakwe ekhefini elikhethekile ngenxa ‘yezinkinga ezihambisana nengcindezi yengqondo’ ngokusho kwale kilabhu yaseMoroccan.
URulani Mokwena, oneminyaka engu-38 ubudala, ujoyine iWydad ekuqaleni kwesizini enikezwe umsebenzi wokuguqula izinto eqenjini.
Usayinise abadlali abangu-29 okubalwa kubo uThembinkosi Lorch noCassius Mailula baseNingizimu Afrika. Bobabili babolekisiwe.
Ngaphansi kukaMokwena, iWydad njengamanje ihlezi endaweni yesithathu kwilogi yeBotola Pro I njengoba sekusele imidlalo emithathu.
Ngesizini edlule leli qembu liqede endaweni yesithupha. UDoctor Khumalo ukhale ngokugxekwa kukaRulani Mokwena.
Ekhuluma kwiSoccerzone kuleli sonto, ubuze ukuthi, “Kanti kufanele enzeni?”
Uthe abalandeli beWydad, hhayi iqembu, yibona abayinkinga.
“Abalandeli yibo abahlukumeze uRulani,” kuqhuba uKhumalo owayaziwa ngelika-16V esadlala.
Irekhodi likaMokwena kwiWydad alilibi njengoba limi emidlalweni engu-35 enqobe engu-14, wadlala ngokulingana angu-14, wahlulwa kweyisikhombisa kuphela.
UKhumalo uphinde wadalula izinkinga ezishaqisayo ebezenzeka kuleli qembu ngesikhathi sikaMokwena.
Kubikwa ukuthi uMokwena ubephoqeleka ukuzithengela yena izinsiza zokucija abadlali.
Kuphinde kwavela ukuthi ubesehlale izinyanga eziyisishiyagalombili engaholi.
UKhumalo uphakamise ukuthi abaqeqeshi baseNingizimu Afrika babhekana nokuphathwa okungekuhle ngaphandle kwakuleli.
“Isibonelo salokho nje sisibona kulento kaRulani,” kuchaza uKhumalo.
Ubize ukusebenza kahle kukaMokwena, uma kubhekwa izimo.
