UCardoso uveza akubheke kuSaleng kwiMamelodi Sundowns
Umqeqeshi weMamelodi Sundowns uMiguel Cardoso usencome umthelela osheshayo kaMonnapule Saleng kuleli qembu.
Lokhu kungemuva kokuthi lo mdlali owake wadlala kwi-Orlando Pirates egcine edlale okokuqala kumaBrazilians ngeSonto.
UMonnapule Saleng ujoyine iMamelodi Sundowns emnayakazweni owenzeka ungazelelwe ngoJanuwari.
Nokho ubebekwe eceleni engadlali ngenxa yokulimala abefike nakho kuleli qembu laseChloorkop.
Kodwa-ke, uqede noma yikuphi ukungabaza obekukhona mayelana nokuqina kwakhe ngesikhathi edlala iSundowns ishaya iSekhukhune United ngo 3-1.
Ube nomthelela ngokushesha lapho eshiya uDaniel Cardoso elele amankeyane wabe eseshaya iphasi u-Iqraam Rayners ashaye ngayo igoli lakhe lokuqala.
UKWELULAMA OKUMANGAZAYO
UMiguel Cardoso uveze ukuthi ikilabhu ibisiqaphe kakhulu ukwelulama kukaSaleng.
Uthe bebengafuni ukujaha ukudlalisa lo mdlali weBafana Bafana engakulungeli ngokugcwele.
“USaleng wenze kahle,” uCardoso usho kanje kwabezindaba ngemuva komdlalo.
“Welulame ngendlela emangalisayo. Asikaze sifune ukufaka ingcindezi ekubuyeni kwakhe futhi namanje akumele.
“Usaqubeka nokucijwa ukuze aqine ngokwanele nokuqonda esikudinga kuye enkundleni.”
UZODLALA IZINDAWO EZEHLUKENE
Yize uMonnapule Saleng aziwa kakhulu njengomdlali wasophondweni, uCardoso uveze ukuthi abalandeli beMamelodi Sundowns kufanele balindele ukumbona ezindaweni ezahlukene.
- Angaba yisixazululo ophondweni lwesokudla: Bebhekene neSekhukhune, uSaleng utshalwe kwesokudla ukuze avikele uKhuliso Mudau obesethintekile eqakaleni.
- Angadlala uNo. 10: UCardoso uveze ukuthi ikhono likaSalenge uma ebhekene ngqo nendoda limvumela ukuthi adlale “ngaphandle noma ngaphakathi”.
Uveze ukuthi kungenzeka amdlalise maphakathi, kuNombolo 10 emidlalweni ezayo. - Ukusiza uma kumakwa: Lo mqeqeshi uncome uSaleng ngokugcina uhlaka lweqembu, eqinisekisa ukuthi iSundowns ayigqobhozeki kalula ngesikhathi izingela amagoli.
UMJAHO UYASHUBA
Ukunqoba kwiSekhukhune kubuyisele iSundowns ekutheni ilingane ngamaphuzu ne-Orlando Pirates – bobabili banangu-41.
AmaBhakabhaka nokho yiwo asaqhwakele ngomehluko wamagoli kulandela ukubhubhisa kwawo iKaizer Chiefs ngo 3-0 ngoMgqibelo.
Ukufika kukaMonnapule Saleng kwengeza isici esisha esesabekayo ekuhlaseleni kweMamelodi Sundowns evele ihlome kahle njengoba inoRayners noBryan Leon.
FUNDA NALA | UNabi ushwabulele iChiefs ephawula ngokuhlulwa kwayo
KuCardoso, ukuba nomdlali ofana noSaleng kungase kube yisici esibalulekile emjahweni wokuvikela isicoco seBetway Premiership.
