UBroos ngeke abancenge abachizela iBafana
- Sibongiseni GUMBI
UJayden Adams weStellenbosch FC, usenziwe isibonelo sendlela abadlali, ikakhulukazi abasebancane, okungamele baziphathe ngayo.
Lo mdlali wasesiswini oneminyaka engu-23 usale ngaphandle esikwatini seBafana Bafana esiya ekhempini ngesonto elizayo.
Lokhu kungenza yokuthi walichizela leli qembu likaHugo Broos ngenyanga edlule, ethi unento emxakile, uzobuye abone uyeza yini ekhempini.
UBroos wabe esemhoxisa, akangaziveza izizatu zalokho, wathi ezokungaziphathi ngendlela ayilindele kubadlali bakhe.
Kodwa ngoLwesine ulibhobosile ithumba. Uthe u-Adams wavele wacela ukufika sekudlule isikhathi, akangasisho isizathu salokho.
“Ngicabanga ukuthi kuyinto ebalulekile kuwo wonke umdlali ukubizwa eqenjini lesizwe,” kusho uBroos ephendula eka-Adams.
“Akukhathalekile ukuthi ungowaseBelgium, ungowaseChina noma ungowaseNingizimu Afrika.
“Kuyinto ebalulekile ukubizwa eqenjini lesizwe. Uma ungenawo lowo muzwa, ngeshwa kusho ukuthi awunazo izifiso ezinkulu.
“Ngesikhathi ngisengumdlali, kwakuthi uma ngibizwa eqenjini lesizwe, ngisho ngabe kwakungadingeka ngigijime amakhilomitha angu-100 ukufika khona, ngangingakwenza lokho.
“Manje uma umfana osemncane njengoJayden ekufonela ekutshela ukuthi, ‘ngicela ukufika sekwedlule isikhathi ngenxa yesizathu engingeke ngikwazi ukukutshela sona’.
“Ngiyaxolisa, akuyona indlela efanele. Uneminyaka engu-22, kumele ngabe ugijima usuka eKapa uye eGoli ukuze ube sekhempini.
“Sengimhlawulisile njengamanje, kodwa ngeke kube unomphela. Uma uJayden ebuyela ezingeni lakhe, uzobuyela eqenjini lethu.
“Uma ungumdlali waseNingizimu Afrika kumele wazi ukuthi ukuza ekhempini yeBafana kuwukuhlonishwa, kuwumsebenzi wezwe.”
UBroos uthi lento yokuchizela iqembu lesizwe yinto eyandile e-Afrika njengoba nangesikhathi eqeqesha eCameroon ayebhekana nayo.
“Kumele sihloniphane. Ngeke sivumele abantu ukuthi benze noma yini. Nabadlali eCameroon babefika bavele baqale baye emindenini yabo.
“Uma umbuza, athi, ‘mqeqeshi sesiside isikhathi ngingawuboni umndeni wami’. Bese ngithi, ‘kunjalo, nami angisawazi owami umndeni’.
“Kumele ube nomuzwa wokuthi kuyinto enkulu ukuba seqenjini lesizwe,” kuqhuba uBroos.
“Ngiyacabanga laba badlali abangu-23 engibabizile, bazofika ngoLwesibili benalowo muzwa wokuziqhenya ukuba seqenjini lesizwe.”
IBafana izobhekana ne-Uganda ngoNovemba 15 ekuhambeni, bese idlala neSouth Sudan, eKapa ngoNovemba 19.
