UMbesuma uhlonza okukhubaza abagadli kwiChiefs
Inkakha yeKaizer Chiefs uCollins “Ntofontofo” Mbesuma useveze umbono wakhe ngobuthuntu obuhlasele leli qembu phambili muva nje.
Ekhuluma kwi-Ultimate Soweto Derby Round Table ngoLwesihlanu, le ngwazi yaseZambia ihlonze lokho ekubona kukhubaza iChiefs.
Ukhombe “ukungahambisani kwamaqhinga” njengesizathu esikhulu esenza abagadli baMakhosi bahluleke ukuthola isigqi sabo.
UKUJIKAJIKA
UCollins Mbesuma ugqamise “ukushintshwa” okuqhubekayo kweqembu eliqala umdlalo njengesithiyo esikhulu.
Emidlalweni engu-15 yeligi, iChiefs isisebenzise inqwaba yabagadli abehlukene:
- Naledi Hlongwane
- Wandile Duba
- Ashley Du Preez
- Flavio Silva
- Khanyisa Mayo
“Asinaye umgadli ojwayelekile esingakhomba kuye,” kuphawula uMbesuma.
“Kufakwa lona, adlale imidlalo emibili, bese ephuma. Awukwazi ukuthola isigqi uma kunjalo.”
INKINGA YAMAGOLI
Njengamanje iChiefs ishaya igoli elilodwa emdlalweni ngamunye kule sizini.
Leli qembu alikaze libenomgadli ofinyelela emagolini angaphezi kweshumi kusukela ngesikhathi sikaSamir Nurković ngo-2019/20.
Yize idonsa kanzima phambi kwepali, uCollins Mbesuma ukholwa ukuthi iSoweto Derby ngoFebhuwari 28 yiyo ezovuselela iqembu.
KUZOSIZA ICHIEFS
Uthi ukuthathwa kancane ngaphambi kokudlala neqembu elihubha isicoco kungase kuyisebenzele iChiefs.
“Bangamangaza abantu. Sinabagadli abahle; wukuthi babhekene nezinselelo nje,” kugcizelela uMbesuma.
“Abantu bacabanga ukuthi iPirates izowina iligi, kodwa nathi sikhona emjahweni.”
NgokukaMbesuma, ithalente likhona, kodwa uzinzo olungekho njengamanje.
FUNDA NALA | Yini eyenza awePSL aqinise ezokuphepha manje
Uma uCedric Kaze noKhalil Ben Youssef befuna ukuvala imilomo kulabo abangabathembi, kuzomele baqoke umgadli bese befa naye.
