OweChiefs uchaza ‘eyokulala’ ngejezi nendondo yeNedbank Cup
Umdlali wasesiswini weKaizer Chiefs, uGeorge Matlou, usechaze ngamavidiyo akhe athathe amehlo muva nje.
La mavidiyo lo mdlali weKaizer Chiefs uwenze egqoke indondo nejezi ayeligqoke benqoba i-Nedbank Cup.
Athathe amehlo ezinkundleni zokuxhumana ngemuva kokuthi Amakhosi enqobe indebe yawo yokuqala eminyakeni engu-10.
Kulamavidiyo, uGeorge Matlou uyabuzwa ukuthi uhlose ukugqoka leli jezi nendondo isikhathi esingakanani, aphedule athi, ‘kuze kube uLwesine’.
Ubuzwe ngalamavidiyo abonakala kuwo egqoke ijezi nendondo ye-Nedbank Cup ngosuku lwabezindaba lweKaizer Chiefs eNaturana Village ngoLwesithathu.
“Bekuwumuzwa omuhle kimina ukuthi ngiwine indondo,” kusho uMatlou, obekwiSwallows FC ngaphambi kokujoyina iChiefs.
“Ngakho-ke bekufanele ngiveze imizwa yami… kube yimpumelelo obekukade ngangiyifisa n njengomdlali.”
La mavidiyo ajatshulelwe kakhulu, ikakhulukazi ngabalandeli baMakhosi abakubone kuhlekisa kakhulu lokhu kuchoma kwalo mdlali.
“Ukunqoba indebe neqembu elinegama elikhulu njengeKaizer Chiefs kuyimpumelelo enkulu kimina.
“Sekuyisikhathi eside sagcina ukunqoba indebe – bese kukhulunywa ngeminyaka engu-10…
“Kodwa manje ngisemabhukwini omlando wekilabhu ngokuwina okuthile neqembu.”
UGeorge Matlou wenqabile ukungena kakhulu ekukhulumeni ngekusasa lakhe kwi-Kaizer Chiefs.
Inkontileka yakhe izophela ngenyanga ezayo kanti kubikwa ukuthi uqashwe ngeso lokhozi AmaZulu FC.
Uthe okwamanje yena ugxile ekusizeni iChiefs iqede kwiTop 8 ngokuqinisekisa ukuthi iyawunqoba umdlalo wayo wokugcina.
Amakhosi azosingatha iPolokwane City eFNB Stadium ngoMgqibelo emdlalweni wawo wokugcina weBetway Premiership.
“Isimo eqenjini sihle kakhulu kusukela emdlalweni wamanqamu, kodwa manje sesilungiselela umdlalo wePolokwane.
“Kungumdlalo wokugcina weligi, nakanjani kufanele siwunqobe,” usho kanje ngalo mdlalo.
“Siwubheke ngabomvu, kufanele sifake wonke amandla – ngisho noma ngabe unokulimala noma yini, kufanele siwunqobe lo mdlalo.”
