OweBucs uvele abafake ‘ku-voicemail’ abalandeli abamkhwazayo
Umdlali wasesiswini we-Orlando Pirates, uThalente Mbatha, usephawule ngokujijinyezwa abalandeli abhekane nakho bebhekene neCR Belouizdad.
UMbatha uke walahla amabhola izikhawu ezimbalwa kulo mdlalo weCaf Champions League obuse-Orlando Stadium.
Lokhu kunenge abalandeli baze bagcina sebezwakalise ukungenami kwabo ngokuthi bamhhahhameze.
Nokho ubuye waligeza igama lakhe, wenza abalandeli bawalibala amaphutha abewenzile eshaya elihle igoli.
Umqeqeshi uJose Riveiro unxuse abalandeli ukuthi bengakwenzi abakwenze kuMbatha ngoba kuyabalimaza abadlali emoyeni.
Ekhuluma ngemuva komdlalo uMbatha uthe akakunaki ukugxekwa ngabalandeli.
“Abalandeli bahlale benemibono,” kusho yena. “Abalandeli bazohlala bekhuluma.
“Ngakho-ke, yinto engangeni engqondweni yami ngoba noma wenza okubi noma okuhle bazohlala bekhuluma.
“Abanye bahlezi bebheke okungekuhle ozokwenza, ngakho mina ngivele ngigxile ekudlaleleni iqembu hhayi bona.
Ngegoli lakhe, uMbatha uthe ozakwabo bamgqugquzele ukuthi adedele ishodi ekude ukuze ahlole unozinti ukuthi uphapheme kangakanani.
“Ngesikhathi sibuya ngesiwombe sesibili, ozakwethu bathe kumele ngike ngikhahlele, ngihlole unozinti ukuthi uqaphile yini.
“Ngicabanga ukuthi uma ngithola ibhola, bebengenaso isiqiniseko sokuthi ngizokhahlela noma cha,” kusho uMbatha.
“Ngilizwe lisuka nje onyaweni ibhola ukuthi liyodla inethi. Ngisebenzise indlela yokukhahlela ngamafaso.”
