Maningi azoshintsha ubunikazi kwiChampionship
Kunamakilabhu amaningana adlala kwiMotsepe Foundation Championship angase ashintshe ubunikazi, cishe namagama ngaphambi kwesizini entsha.
Ushintsho lokuqala oseluqinisekisiwe olweJDR Stars, umnikazi wayo uNditsheni Nemasisi osedayise isitifiketi salo sokudala kulesi sigaba sesibili sePSL.
NgoLwesine ebusuku, wazise abadlali ukuthi leli qembu selidayiselwe usomabhizinisi waseLimpopo uLester Makotoane, ohlose ukulithuthela esifundazweni sakubo.
“Kwakuyisifiso sami ukunazisa mathupha, kodwa lokho akunakwenzeka,” kubhala uNemasisi.
“Ngiqinisekisa ukuthi ngithengise isitifiketi seNFD seJDR Stars kubanikazi abasha.”
Ukucacisile ukuthi ukudayiswa kusalinde ukugunyazwa yisigungu esengamele iPremier Soccer League (PSL).
Kodwa-ke, yize besalinde lokho, abadlali abanezinkontileka bazokwethulwa kumnikazi omusha weqembu ngokushesha ukuze babe bejwayela ikhaya labo elisha.
Abadlali abanezinkontileka eziphela ngoJuni 30 bazonikezwa izincwadi zokubakhulula uma bezidinga.
UNemasisi ugcizelele ukuthi ukudayiswa kwesitifiketi kwenziwe ngokulandela imigomo yeNational Soccer League (NSL).
I-JDR Stars kungenzeka kungabi ukuphela kweqembu elizoshintsha izandla ngaphambi kwesizini entsha.
Kukholakala ukuthi iPretoria Callies ixoxisana neCape Town Spurs, edliwe yizembe kwiMT Championship kule sizini kodwa esifuna enye indlela yokuhlala kule ligi.
Uma isivumelwano siphumelela, iSpurs ingase iqhubeke nokudlala kwiMT Championship nangesizini ezayo.
Ngaphezu kwalokho, usomabhizinisi wasogwini oluseningizimu KwaZulu-Natal kubikwa ukuthi uxoxisana nabe-Upington City ngenhloso yokuyithenga.
Uma ephumelela, uzoyithuthela eKZN nale kilabhu, kwande isibalo samaqembu adlala ezigabeni ezikhokhelayo esifundazweni.
IMilford FC yona kukholakala ukuthi isezinhlelweni zokudayiselwa usomabhizinisi waseBloemfontein u-Eddie Modise ofuna ukuvusa iBlomefontein Celtic.
