Kuphele iphupho leMTN8 AmaZulu yize elwile 

Iphupho lika-Arthur Zwane lokwenza AmaZulu FC ompetha bendebe lisahlehlile okwamanje.

Lokhu kuza ngemuva kokuhlulwa yiSekhukhune United ngo 4-3 emdlalweni weMTN8 ngeSonto ntambama.

Yize luhluliwe, Usuthu lukhombise isibindi ngokubuya kade selulandela ngemuva ngo 3-1 lwalinganisa kwaba ngo 3-3, kwaphoqa ukuthi umdlalo uye esikhathini esengeziwe.

UThando Ngwenya ushaye igoli lokuqala ngomzuzu ka-14, kodwa uTshepo Mokoena walingenisela iSekhukhune ngaphambi kwekhefu.

Ngemuva kwekhefu, uTshepo Rammala noGivemore Khupe bashayele iBabina Noko amagoli amabili asheshayo kwaba ngu 3-1.

UNgwenya ubuye washaya elesibili ngaphambi kokuthi uTarriq Fielies alinganisele AmaZulu kube ngo 3-3.

Esikhathini esengeziwe, uVuyo Letlapa ushaye igoli elinqume umphumela walo mdlalo, waqinisekisa ukunqoba kweSekhukhune ngo 4-3.

Lokhu kuyibekisela indawo emdlalweni eyandulela owamanqamu kulo mqhudelwano.

• FUNDA NALA | Adayise aphela aweChiefs ne-Arrows

ISekhukhune isijoyine i-Orlando Pirates neMamelodi Sundowns kweyandulela owamanqamu, kanti iqembu lokugcina lizophuma phakathi kweKaizer Chiefs neGolden Arrows.

• EZISHISAYO| Cofa lapha usithole kuWhatsApp