Kubhimbile kuMokwena i-MC Alger ivula ngenduku

I-MC Alger iwuqale ngebatha umkhankaso wayo weCaf Champions League ngemuva kokuhlulwa ngo 2-1 ibhekene ne-Al Hilal eKigali, eRwanda.

Ukuhlulwa kuphawule ukuhlulwa okokuqala ngqa kwe-MC Alger emdlalweni wokuvula kulo mqhudelwano, futhi kuyifake ingcindezi.

Umqeqeshi uRulani Mokwena usebhekwe ngabomvu ngoba iqembu lakhe belibhekwe ukuthi lizowaqoqa kalula amaphuzu ngaphambi kokuhlangana namaqembu aqinile.

Umdlalo bewungelula, kodwa i-Al Hilal ikwazile ukusebenzisa amaphutha asemuva ezikaMokwena ukuzijezisa.

Abadlali beMC Alger baphume enkundleni bebonakala bephoxekile ngemuva kokudedela amagoli amabili alula aveze ubuthaka emuva.

Ukuhlulwa kuphoqa le kilabhu ukuthi iphinde ihlangane ngokushesha futhi ilungise amaphutha ngaphambi komdlalo wangempelasonto ezayo.

I-MC Alger ibuyela e-Algiers ukuyosingatha iqembu elihlulwe kowamanqamu ngeisizini edlule iMamelodi Sundowns.

Leli qembu elike lacijwa uyena uMokwena phambilini liyaziwa ngokungaxoleli uma libhekene neqembu elenza amaphutha emuva. 

Lo mdlalo usubhekwe ngabomvu njengoba i-MC Alger ingeke ikwazi ukuhlulwa umdlalo wesibili kulandelana kuleli qoqo layo elinzima.

URulani Mokwena kumele aqinise amacebo okuvala emuva bese ethuthukisa nokuzethemba eqenjini lakhe ngaphambi kwalo mdlao weSundowns. 

FUNDA NALA | UMaluleka ucacisa eyokushiya iChiefs

Khonamanjalo, iSundowns yona izosingatha iSt Eloi Lupopo yaseDR Congo ngoMgqibelo ibheke ukunqoba ukuze isunduze i-Al Hilal eqhulwini. 

ZITHOLE ZISHISA: Cofa lapha usithole kwiWhatsApp Channel yethu