ISiwelele nezingezinhle kwabaduma kwiChiefs nePirates 

ISiwele FC, okuyiqembu elisha kwiBetway Premiership, isithathe isinqumo esidumazile kubadlali ababili abaduma kwizinkunzi zaseSoweto – iKaizer Chiefs ne-Orlando Pirates.

Kuvela ukuthi leli qembu linqume ukungabasayini abadlali basesiswini abanamava uXola Mlambo noKamohelo Mahlatsi. 

UMlambo wazakhela igama kwi-Orlando Pirates kanti uMahlatsi yena uke wagijima kwiKaizer Chiefs eminyakeni embalwa edlule.

Bese kuphele amasonto ambalwa behlolwa kwiSiwelele, benethemba lokuthola izinkontileka njengoba kade bechithwe yiMarumo Gallants nje.

I-Siwelele FC, ethole isikhundla kwiligi enkulu ngokuthenga iSuperSport United, izoqale izinze eGauteng ngesizini ezayo ngaphambi kokuthuthela eBloemfontein unomphela. 

Le kilabhu inabadlali abaningi abazozama inhlanhla njengoba yakha kabusha iqembu layo kulandela ukuthi abanye babadlali abebekwiSuperSport United beshiyile.

Isanda kuqoka uLehlohonolo Seema njengomqeqeshi oyinhloko, kanti uzolekelelwa ngu-Andre Arendse njengephini noGrant Johnson njengomqeqeshi wonozinti.

Njengengxenye yomkhankaso wabo wokuhlonza abadlali, iSiwelele umeme idlanzana labadlali abangenamaqembu kodwa banamava ukuze bezohlolwa.

• FUNDA NALA | Ukhonjwa eGauteng uFawaaz Basadien ongasaziciji neStellies

Kubo bekukhona uMlambo noMahlatsi, bobabili abashiye iMarumo Gallants ngesizini edlule. 

Kubikwa ukuthi noKwanda Mngonyama ukhona kuleli qembu, kanti uVincent Pule naye usalinde ukuzwa ukuthi lithini ngaye.

• COFA LAPHA: | Usijoyine kuFacebook

UMlambo noMahlatsi bona kuvela ukuthi sebetsheliwe ukuthi bangabe besazihlupha ngokuqhubeka nokuzicija neqembu ngoba ngeke basayinwe. 

WINA! GCWALISA IFOMU NGEZANSI UZIWINELE IJEZI LEQEMBU LAKHO