Isiqalile futhi ukugqilaza iSundowns – ivuke ngoSuthu
IMamelodi Sundowns ivuke yazithatha ngemuva kokuqala ngegiya elingelihle emidlalweni yeBetway Premiership ngempelasonto.
Ibambane neChippa United ngo 1-1 ekuhambeni emdlalweni wayo wokuqala. Kodwa ngoLwesibili isisekhaya, izidlulele kalula kuMaZulu FC.
ISundowns ikhombisile ukuthi namanje isekude kunamanye amaqembu njengoba ikwenze kwabukeka kulula nje ukushaya Usuthu.
Inqobe lo mdlalo ngo 2-0 wamagoli o-Iqraam Rayners noTashrique Mathews, ikhombisa umqeqeshi woSuthu ukuthi kusazomele aqinise emuva.
Khonamanjalo, empini yamaqembu amasha kwiBetway Premiership, kunqobe i-Orbit College eshaye iSiwelele FC ngo 1-0 ngawo uLwesibili ebusuku.
Igoli leMswenko Boys lishaywe uLetsie Koapeng ngomzuzu ka-73, kanti liqhamuke yize kade kuyiSiwelele esiphethe umdlalo.
Komunye umdlalo wangoLwesibili ebusuku, iMarumo Gallants ibuyele phezulu eqhulwini kwilogi yeBetway Premiership.
FUNDA NALA |Â Iyaqina ingcindezi ku-Ouaddou kwiBucs
Lokhu kwenzeke ngemuva kokuthi ishaye i-Orlando Pirates ngo 2-1 emdlalweni obuseBloemfontein.
IPirates yona isabhajwe emsileni welogi njengoba seyidliwe kuyo yomibili imidlalo yayo yeligi.
