Inkakha inxenxa uZungu ngokumele akwenze ngoSuthu
- Alfred NGUBANE
URichard Ngubane, oyinkakha yaMaZulu FC, useveze ukuthi ubona uSandile Zungu kumele avele alidayisele omunye leli qembu.
Uthi njengoba izindleko zokuliphatha zilokhu zinyuka futhi zibonakala zimphunyuka nje, kumele asheshe enze okufanele.
Kuzokhumbuleka ukuthi neMoroka Swallows idayiswe ekupheleni kwesizini edlule sekukubi, abaphathi bevele ngezindlebe ezikweletini.
Manje uNgubane naye upopola ingozi efanayo elengela Usuthu uma uZungu engaludedeli kusekuhle nje.
“USandile Zungu kumele asheshe alidayise uSuthu kumuntu onemali ngoba kuyacaca luyamehlula,” kusho uNgubane exoxa neLisenethini.
“Uzogcina elahlekelwe imali eningi njengoba engenabo abaxhasi beqembu abaqondile.”
Ekupheleni kwesizini edlule, Usuthu luhlukane neSpar, obesehlale iminyaka eminingi exhase leli qembu.
Emasontweni ambalwa edlule kwethule i-Amandla Mobile njengabaxhasi abakhulu beqembu, obekuyinkampani ebingaziwa ngaphambi kwalokhu.
“Iqembu lidinga abaxhasi impela. Ngaphandle kwabo kuba nzima kakhulu.
“Kuba ngcono kumuntu ofana noPatrice Motsepe ngoba unemali yakhe…
“Kodwa kwanaye uyabadinga abaxhasi,” kuqhuba uNgubane.
Ube eseveza uzwelo analo ngabalandeli baleli qembu ngoba lihlezi liwela ezandleni zabantu abathembisayo, kodwa abagcina behluleka.
“Ngibona ukuthi leli qembu linomkhokha omubi ngoba abaphathi bafika bethembisa.
“Kodwa bagcina bephenyeka ibheshu ukuthi abanayo imali eyanele yokuphatha iqembu.
“AmaZulu FC kumanje ashona phansi kancane kancane… Abadlali abakhona eqenjini ngabadlali abangeke balisize ngalutho uSuthu,” kusho uNgubane.
UNgubane wayengukaputeni waMaZulu FC ngeminyaka yama-70s ngaphambi kokuthi athathe umhlalaphansi ebholeni elikhokhelayo.
ILisenethini isanda kubika ukuthi inyunyana yabadlali, iSapfu isanda kuhlangana nobuholi boSuthu ngendaba yemali.
Kuvela ukuthi Usuthu luhlongoza ukwehlisela abadlali abathile imiholo ngenxa yokuthi isimo semali asisihle kahle.
