Ingwazi yeChiefs ixwayisa umgadli omusha ngokubhekwe kuye
Njengomgadli omusha kwiKaizer Chiefs, uFlavio Silva unomthwalo omkhulu emahlombe akhe futhi udinga ukwenza into ebonakalayo ngokushesha okukhulu.
Yilokhu ingwazi yale kilabhu uCollins Mbesuma akubheke kulo mgadli. Kodwa uFlavio akazange abe nomdlalo omuhle emidlalweni emibili yobungani aseyidlalile kuze kube manje.
Lo mgadli oneminyaka engu-29 ubudala waseBissau-Guinean ubekezelele umdlalo onzima ngesikhathi iKaizer Chiefs ihlulwa ngo 2-1 yiVitesse ngoLwesibili.
Abalandeli abazange bazibambe, baqala bashaya amakhala ngokuthi abakuboni okuhlukile lo mgadli afika nakho eqenjini.
UFlavio ulahle amabhola ngendlela engagculisi futhi akangaba namthelela obonakalayo emizuzwini engu-45 ayidlala kulo mdlalo.
Abalandeli beKaizer Chiefs ezinkundleni zokuxhumana basheshe baphakamisa ukungagculiseki kwabo.
Abanye baze bathi ikilabhu “iphinde yaqolwa” — okungamazwi aqine kakhulu ngemuva kokumbona emdlalweni owodwa.
UFlavio uphinde wanikezwa ithuba ngesikhathi behlulwa ngo 4-0 yiFC Utrecht, nakhona wahluleka ukuba nomthelela obonakalayo, okushiye abalandeli bekhungathekile.
Akabange esadlala emdlalweni wesithathu la iChiefs ihlulwe khona ngo 1-0 yiNEC Nijgemen ngoMgqibelo ntambama.
Manje uMbesuma usexwayise lo mgadli ngokuthi akanaso isikhathi – kumele enze umehluko zisuka nje, ngale kwalokho uzoba nenkinga.
Umlayezo kaMbesuma – onerekhodi lokushaya amagoli angu-35 ngesizini eyodwa kwiKaizer Chiefs – unomlayezo ocacile obheke kuSilva.
“Kumele abhakuzise inethi manje,” kusho uMbesuma kwabeSowetan. “KwiChiefs noma kwiPirates, abalandeli abakuniki isikhathi.
“Uma unikezwa imizuzu engu-45, leso sekuvele yisikhathi esiningi kakhulu ukuthi usisebenzise.
“USilva kumele azi ukuthi kwiChiefs njengomgadli awunaso isikhathi sokuthi usazijwayeza isimo eqenjini.
“Udinga ukushaya inethi zisuka nje, ngale kwalokho abalandeli bazohlala bekuxinile, bekusola,” kwengeza uMbesuma.
USilva usayinwe esuka eqenjini lase-Indonesia iPersebaya ukusiza ukulungisa izinkinga zeChiefs phambili.
Lokhu belulandela ukuthi lezi ziqhwaga zaseSoweto zishaye amagoli angu-32 kuphela emidlalweni engu-28 yeligi ngesizini edlule.
Njengoba iKaizer Chiefs isesohambweni lwayo lwase-Europe, uSilva uneminye imidlalo yobungani emibili yokuthi akhombise abalandeli ukuthi bengamethemba.
Kodwa njengoba uMbesuma nabalandeli abaningi sebemxwayisile — uzodinga ukukwenza ngokushesha lokho.
Uma ehlulekile, uzozithola esesimweni esixake uRanga Chivaviro kumasizini amabili ekwiChiefs la ebehhanyezwa ngabalandeli.
