Ihlazo owaseGhana emiswa inomphelo ebholeni lase-US
Umdlali weqembu lesizwe laseGhana uYaw Yeboah usemisiwe unomphela ebholeni yiMajor League Soccer (MLS) yase-US.
Lesi sinqumo esishaqisayo silandela uphenyo olunzulu mayelana nezinsolo zokugembula okungekho emthethweni.
Lo mdlali odabuka eGhana uke wagqama kwiColumbus Crew neLos Angeles utholwe enecala lokubheja okuyinto engavumelekile kubadlali bezigaba ezikhokhelayo.
Okuyichilo kakhulu wukuthi uphenyo luveze ukuthi ubebheja nasemidlalwnei yeqembu lakhe – naye adlala kuyo.
UBEBHEJA OKUKHETHEKILE
Uphenyo luthole ukuthi uYeboah nozakwabo waphambilini uDerrick Jones babesebenzisana kulo mshikashika wokubheja ngesizini ka-2024 neka-2025.
Ubufakazi buhlanganisa ukubheja okukhethekile kokuhlonza izinto ezizokwenzeka emdlalweni.
Lo mdlalo waseGhana nozakwabo kubikwa ukuthi babheja ukuthi uJones uzothola ikhadi eliphuzi emdlalweni othile.
Nebala uJones walithola lelo khadi njengoba babehlonzile, okuyinto eqinisekisa ukuthi bebephula imithetho yeligi.
KUBABHEDELE
Lokhu kumiswa kwakhe unomphelo kuqeda ngomsebenzi kaYeboah eNorth America.
IFifa nayo kulindeleke ukuthi imyekise ibhola elikhokhelayo emhlabeni jikelele lo mdlali oneminyaka engu-28 ubudala.
Lokhu kuzovimbela umdlali wasemuva weBlack Stars ukuthi adlale ibhola elikhokhelayo kunoma yiliphi izwe elingaphansi kweFifa.
UKhomishana weMLS uDon Garber ugcizelele inqubomgomo yokungabekezeleli ukungaziphathi ngendlela nokwephulwa kwemithetho.
FUNDA NALA | Kuxwayiswa uZungu ngethuba lokugcina
I-MLS kuvela ukuthi ihlose ukuvikela ubuqotho bebhola ngazo zonke izindlela.
Ukumiswa kukaYeboah kuyisexwayiso esibi. Ukubheja uma ungumdlali wezinga elikhokhelayo kungaqeda umsebenzi.
