IChiefs ihlela ukulanda izihlabani ezinofakazi ngoJanuwari
- Intatheli yeLISENETHINI
IKaizer Chiefs seyifingqe imikhono, izilungiselela ukungena ngendlov’iyangena ewindini elilandelayo lokudayiselana ngabadlali elizoqala ngoJanuwari.
Abaphathi kubikwa ukuthi babheke abadlali abaningi abasezingeni eliphezulu ukuqinisa ngabo isikwati sikaNasreddine Nabi.
Ohlwini olungakaqinisekiswa, kuvela amagama amakhulu afana nelikaMahmoud Kahraba we-Al Ahly.
UKahraba ungumgadli onekhono eliyinqaba futhi ongafika namava amakhulu eqenjini.
Omunye ngumgadli wase-Angola u-Agostinho Mabululu, odlala kwi-Al Ahli Tripoli njengamanje.
Irekhodi lakhe elihle lokubhakuzisa inethi sengathi ushunqiselwe ngayo yilo elidonse amehlo eChiefs.
Omunye ngumdlali waseTanzania, uFeizel Salum we-Azam FC okuthiwa naye usehehe izinhloli zeChiefs. USalum waziwa ngobuchule bakhe maphakathi nenkundla.
Umgadli waseKenya uMichael Olunga, oyisihlabani kwiSaudi Pro League, ungomunye osezingeni eliphezulu okuvela ukuthi iChiefs iyamfisa.
Okokugcina, abadlali baseNingizimu Afrika u-Elias Mokwana, odlalela i-Esperance yaseTunisia, no-Oswin Appolis wePolokwane City, nabo basohlwini.
Njengoba kuzovulwa iwindi lokudayiselana ngabadlali esikhathini esingaphansi kwezinyanga ezimbili, iChiefs kulindeleke ukuthi ithathe izinyathelo ezinqala.
Abalandeli bazobe bebheke ngabomvu ukubona ukuthi ngubani ojoyina leli qembu labo alizinze eNaturena.
Nokho leli qembu kuzomele likhulule abanye babadlali balo bangaphandle ukuze likwazi ukwamukela abasha.
Njengamanje Amakhosi ano-Inacio Miguel, uChristian Saile, uFiacre Ntwari, uThatayaone Dithlokwe, no-Edson Castillo kubadlali bangaphandle.
