IChiefs ibhekene nesinqumo esinqala ngo-Ox
- Intatheli yeLISENETHINI
IKaizer Chiefs izomfaka endalini umdlali wasesiswini emthenge ngesizini edlule, uSibongiseni “Ox” Mthethwa.
Ngokombiko wakamuva weSNL24, uMthethwa akekho ezinhlelweni zomqeqeshi uNasreddine Nabi.
Kuthiwa iChiefs beyifisa ukubolekisa ngaye ngewindi elidlule lokudayiselana ngabadlali.
Kodwa njengoba lokho kungasenzekanga, kuvela ukuthileli qembu laseNaturena selicabanga ukuvele limdayise.
“Kunabadlali umqeqeshi asecele ukuthi kubolekiswe ngabo,” kucashunwe umthombo usho kanje.
“Kukhona nalabo acabanga ukuthi ngeke abadinge ngisho nangesizini ezayo, ngeshwa u-Ox ungomunye walabo.
“Manje sekusele kubaphathi ukuthi bathathe isinqumo esikhulu sokuthi bamdedele aye kwelinye iqembu.
“Kodwa njengoba esasalelwe yiminyaka emibili kwinkontileka yakhe, okuhle abangakwenza wukumdayisa.
“Ngakho ukusuka manje kuya kuJanuwari, ikilabhu kumele ithole ozomthenga noma la izombolekisa khona.
“Yilokho iqembu elisebenza ngakho njengamanje,” kuqhuba lo mthombo.
Kubalwe AmaZulu FC, iqembu lakhe lakudala iStellenbosch FC neRichards Bay FC kulawo okuthiwa afisa ukubolekwa yena.
“Impela akhona amaqembu obekuxoxwa nawo ngokuthi abolekiswe kuwo, kodwa kuze kwavalwa iwindi izingxoxo zingahlangananga.
“Ngakho uma engadayiseki ngokugcwele ngoJanuwari, kungenzeka kuvuselelwe lezo zingxoxo.
“Uma kugcina ngokuthi akadayiseki futhi akabolekiseki kwelinye iqembu, okungenzeka wukuthi balinde kuphele inkontileka bese ingavuselelwa.”
