Ibuyise umfana omncane i-Orlando Pirates ‘kowesicoco’
I-Orlando Pirates yenze ushintsho olushaqisayo eqenjini layo eliqala umdlalo obalulekile weBetway Premiership neDurban City e-Orlando Amstel Arena.
Umqeqeshi u-Abdeslam Ouaddou uqale ngomdlali osemncane uSimphiwe Selepe kulo mdlalo ongomunye wemikhulu kule sizini.
USelepe ungomunye wabahlabe umxhwele ngasekupheleni kwesizini edlule.
Kodwa akakaze abonakale kule sizini, okwenza ukufakwa kwakhe kube yinto edonsa amehlo ngaphambi kwalo mdlalo.
I-Orlando Pirates iyazi ukuthi ukunqoba kwiDurban City kuzowanika ngokusemthethweni isicoco seBetway Premiership.
USelepe ungene endaweni kaMakhehleni Makhaula kanti uzosebenzisana noThalente Mbatha esiswini.
IPirates izothembela kuPatrick Maswanganyi ukuthi avule indlela eya phambili njengoba kunguye odlala uNombolo 10.
Phambili ithembele kwijubane, ikhono nokushesha kukaRelebohile Mofokeng, u-Oswin Appollis noYanela Mbuthuma.
Emuva, u-Ouaddou ubuyisele izethenjwa ze-Orlando Pirates kule sizini.
Ukaputeni uNkosinathi Sibisi uzosebenzisana noLebone Seema maphakathi.
Ezimpondweni kukhona uDeon Hotto noKamogelo Sebelebele okulindeleke balekelele kukho kokubili ukuvala emuva nokuhlasela.
Amehlo azobe ekuSelepe njengoba i-Orlando Pirates ‘igembula’ ngaye emdlalweni ongacacisa ukuthi iyasidla yini isicoco seligi.
Ezinye izindaba ezithokozisayo kubalandeli bamaBhakabhaka wukubuya ekulimaleni kukaTsepang Moremi. Usebhentshini kulo mdlalo.
UMoremi walimala empini enzima neKaizer Chiefs emdlalweni wedabhi yaseSoweto.
Ibiphele kanje iPirates (4-3-3): Chaine – Sebelebele, Hotto, Seema, Sibisi – Selepe, Mbatha, Maswanganyi – Appollis, Mofokeng, Mbuthuma
Ebhentshini: Buthelezi, Chabatshane, Ndaba, Makhaula, Dansin, Mariko, Moremi, De Jong, Makgopa
IDurban City izihlele kanje (4-3-2-1): Asare – Jalai, Mashego, Ncanana, Mkhize – Nodada, Jurgens, Poggoenpoel – Mokwena, Kamatuka – Lubumba
Ebhentshini: Keet, Mahlangu, Gcaba, Goedeman, Koapeng, Domingo, Maarman, Sifumba, De Kock
