ISundowns izofaka usawoti esilondeni esisha kwabeChiefs?
NguNjabulo Shezi
IMamelodi Sundowns ingase yengeze usizi kubalandeli beKaizer Chiefs ngokuthi igxume iyohlala esicongweni kwiBetway Premiership.
Lokhu ingakwenza uma inganqoba uma seyibhekene neMagesi FC eLucas Moripe Stadium ngeSonto ngo-3 ntambama.
Abalandeli beChiefs bavele kumanje baswele umgodi wokucasha kulandela ukuthi iqembu abebegqishe nalo, iStellenbosch FC lithole induku.
IStellies, abebethembe ukuthi sizophoxa omkhaya babo i-Orlando Pirates, ishaywe ngo 3-0 kowamanqamu kwiMTN8 – kwavele kwaba muncu kubo.
Manje, iMamelodi Sundowns , esendaweni yesithathu kwilogi ngamaphuzu angu-11 emidlalweni emihlanu, isele ngamaphuzu amabili emaqenjini ahamba phambili, iSekhukhune United neChiefs.
Njengoba wona ezoze abuyele enkundleni uma eseyohlangana emdlalweni obhekwe ngabomvu ngoLwesibili ebusuku, kungenzeka atholane phezulu eselilandela ngemuva leli qembu lasePitoli.
AmaBrazilian awakahlulwa kule sizini njengoba esenqobe imidlalo emithathu, adlala ngokulingana kabili.
Lo mdlalo weMamelodi Sundowns neMagesi ufika nje lamaqembu asanda kubhekana komunye weligi owawuseSeshego Stadium, eLimpopo, ngo-Agasti 20.
Ngalelo langa iDikwena Tsa Meetse yayimisa kabi iSundowns kodwa yagcina igobe uphondo inqotshwa amagoli avalelwa enethini nguJayden Adams noPeter Shalulile esiwombeni sesibili.
Umgadli wamaBrazilian, uLebo Mothiba, uthi basebenzise isikhathi sekhefu leFifa ukulungiselela lo mdlalo futhi akubakhathazi ukubhekana neqembu abasanda kudlala nalo.
“Sisebenze kanzima kuleli khefu. Sihlangane kahle nabaqeqeshi siziqeqesha nabadlali abebekhona.
“Njengoba sibheke umdlalo ngeSonto neMagesi,” kusho uMothiba.
“Akusididisi emiqondweni ukuthi sizodlala neqembu esisanda kubhekana nalo.
“Sonke sidlala ezingeni elikhokhelayo futhi sinamava. Sikuthatha njengento enhle ukuthi sizophinde sibhekane nabo ngoba sesiyayazi indlela abadlala ngayo.
“Bathanda ukuhlasela ngqo ngamabhola amade ngoba banabagadli abade futhi abanamandla.
“Siyilungele noma yini abazofika nayo ngeSonto,” kuchaza uMothiba.
FUNDA NALA | IPirates emabhukwini omlando weMTN8
Ngesizini edlule iMagesi yanqoba iSundowns ngo 2-1 kowamanqamu weCarling Knockout Cup, kodwa ayilibonanga elidlalayo kwemibili yeligi, iguqiswa ngo 2-1 ekhaya nango 2-0 ekuhambeni.
Lo mdlalo yiwona wodwa oweBetway Premiership ozodlalwa kule mpelasonto njengoba ngoMgqibelo bekunowamanqamu weMTN8.
