IMagesi nomlayezo kubalandeli ngokudliwa yizembe
Iqembu laseLimpopo, i-Magesi FC, seliphawule ngokudliwa kwalo yizembe, lisuka kwiBetway Premiership ngendlela ebuhlungu.
Selithumele umlayezo obhekiswe kubalandeli balo ngalesi sehlo esibi ebhekane naso.
IDikwena tša Meetse ilale iminyaka emibili kuphela esigabeni esiphezulu sebhola laseNingizimu Afrika.
Kuthe ngemuva kokudlala ngokulingana ngo 1-1 neMilford FC emdlalweni wokugcina weyokuhlunga ngoMgqibelo.
I-Magesi ibiye kulo mdlalo yazi kahle ukuthi ukunqoba kuphela obekuzoyisindisa ezembeni.
Izinto zabonakala zihamba kahle ngesikhathi ishaya igoli kuqala futhi yahamba phambili kuze kube yisikhathi sekhefu.
Kodwa izinto zaguquka esiwombeni sesibili lapho iMilford ishaya igoli lokulinganisa, okuyigoli eligcine liqinisekise ukuthi iyolidova kwiNFD ngesizini ezayo.
Leli qembu selikhiphe isitatimende esiveza ubuhlungu elibhekene nabo kodwa lagcizelela ukuthi lesi akusona isiphetho salo.
“UMgqibelo wephule izinhliziyo zethu. Kubuhlungu kakhulu ngoba lo mdlalo ububaluleke kakhulu kithi,” kusho iqembu.
I-Magesi iphinde yabonga abalandeli ngokungayilahli ngesikhathi esinzima futhi yathembisa ukulwa ibuyele esigabeni esiphezulu.
“Ukwehla esigabeni kubuhlungu, kodwa akuguquli ukuthi singobani.
“Lesi yisithiyo kuphela, akusona isiphetho. Sizokwakha kabusha bese sibuya ngamandla. IDikwena tša Meetse izovuka futhi.”
