I-DR Congo ifeze iphupho le-Afrika ngeNdebe yoMhlaba
IDemocratic Republic of Congo (i-DR Congo) iqophe umlando ngokubuyela eNdebeni yoMhlaba okokuqala kusukela ngo-1974.
Lokhu kungemuva kokunqoba kwayo okumangalisayo ngo 1-0 esikhathini esengeziwe ihlula iJamaica emdlalweni wokuhlunga ngoLwesibili ebusuku.
Igoli elilethe le mpumelelo liqhamuke ngomzuzu ka-100 ngesikhathi u-Axel Tuanzebe enamathisela ibhola enethini kade kuyikhona.
Leli goli like langabazisa njengoba bekungathi ulithinte nangesandla labe selihlolwa ngeVAR.
Lolu hlelo lokubhekisisa okwenzekile luvune i-DR Congo, lwathi igoli lihle futhi kumele libalwe.
I-DR Congo beyivele kuyiyo elawula lo mdlalo obuse-Estadio Guadalajara, yakha amathuba angcono, nakuba abengekho acacile.
Umgadli uCédric Bakamu akakwazanga ukufihla injabulo yakhe ngemuva komdlalo.
“Sijabule, sijabule ngempela,” kusho yena. “Njengamanje angicabangi ukuthi sikukholwa ngokugcwele okwenzekile…
“Kodwa nakanjani uma sesibuyele eKinshasa, yila kuzokholakala khona sesibhiyoza.”
Lokhu kungokwesibili kuphela i-DR Congo ingena kule ndumezulu yebhola lomhlaba.
Yagcina ukubonakala eminyakeni engu-52 edlule ngesikhathi lelizwe lisaziwa ngokuthi yiZaire.
Bayiqembu leshumi lase-Afrika elikwazile ukungena kanti bakuGroup K neColombia, iPortugal ne-Uzbekistan.
I-Iraq yiyo egcwalise indawo yokugcina kwiNdebe yoMhlaba ngesikhathi ishaya iBolivia emdlalweni wokugcina kweyokuhlungangoLwesithathu ekuseni.
