Ezintsha ngoYaya Sithole nentshisekelo yeChiefs ngaye
Intshisekelo yeKaizer Chiefs yokusayinisa umdlali wasesiswini weBafana Bafana uSiphephephelo Sithole isiqinisekisiwe.
Imenenja kaYaya Sithole, uManuel Tomas, iyiqinisekisile intshisekelo yeKaizer Chiefs ngalo mdlali oneminyaka engu-26 ubudala.
Kodwa uthi asikho isicelo esisemthethweni esesike safika sivela kule kilabhu yaseNaturena okwamanje.
USithole, okumanje uyalulama ngemuva kokwephuka umlenze. Udlala kwiGil Vicente abolekiswe kuyo yiTondela FC.
Ulimale edlalela iBafana Bafana ibhekene neSouth Sudan emdlalweni wokuhlungela iCaf Africa Cup of Nations ngoSepthemba odlule.
“NgoDisemba, yebo, sathola izingcingo ezivela ekilabhini (iChiefs),” uTomas ucashunwe esho kanje ngabeFarPost.
“Kodwa asikabi naso isicelo esisemthethweni ngoSithole esivela kunoma yiliphi iqembu.
“Kwaba yizingxoxo nje nabamele le kilabhu kodwa akukho okusemthethweni abakuthumela kithi,” kwengeza uTomas.
Ikusasa lalo mdlali wasesiswini alikaqiniseki njengoba ukubolekiswa kwakhe kuphela maduze. Akukacaci ukuthi iTondela izombuyisa yini.
ITondela kungenzeka idlale kwiligi ephezulu ePortugal ngesizini ezayo njengoba kuyiyo ehola umjaho wokukhushulelwa kuyo njengamanje.
SIBAMBE NAKU-FACEBOOK | Lisenethini.co.za
UTomas ukugcizelele ukuthi into uSiphephelo Sithole agxile kakhulu kuyo njengamanje wukululama ekulimaleni kwakhe.
“Uma sekuphela isikhathi sokubolekiswa kwakhe, asazi ikusasa lizobhekaphi,” kuvuma le menenja.
“Njengoba elulama ekulimaleni, uma eseluleme ngokugcwele 100%, kulapho sizobheka ukuthi ikusasa lisibhekisaphi. Ngeke siphoqelele lutho.”
Intshisekelo yeKaizer Chiefs kuSiphephelo Sithole ihambisana nezinhlelo zayo eziqhubekayo zokwakha kabusha iqembu.
Leli qembu limatasa lithungatha abadlali abaqinile basesiswini elizoqinisa ngabo ngesizini ezayo.
USithole, owaziwa ngokuba qatha ngokomzimba nekhono lokuvala thaqa esiswini, angaba yikhongco elibalulekile kuMakhosi.
Futhi njengoba umngani wakhe wesikhathi eside nowayedlala naye kwi-Ethekwini Academy, uThabo Cele osekwiChiefs, uSithole angase akujabulele ukuya eNaturena.
