Ubuso obusha eqenjini likaBroos, kubuye ‘nabadala’
- Intatheli yeLISENETHINI
UHugo Broos, ongumqeqeshi weqembu lesizwe laseNingizimu Afrika, iBafana Bafana ufake abadlali abahlanu abasha eqenjini lakhe lakamuva.
Lo mqeqeshi odabuka eBelgium umemezele abadlali abangu-38 azoqoka kubo abangu-24 azodlala ngabo imidlalo yokuhlungela i-Africa Cup of Nations ngoNovemba.
Ubuyisele nabanye abadlali abambalwa asebebuyelwe yifomu yabo emakilabhini abadlala kuwo.
Unozinti weStellenbosch FC oseneminyaka engu -33 ubudala, uSage Stephens, uqokwe okokuqala kwiBafana.
Abanye abadlali ababili abebeqokwe eqenjini leBafana elidlale kwiCosafa Cup, o-Ashley Cupido noThabang Matuludi nabo bangenile.
UCupido udlala kwiStellies asanda kuyijoyina esuka kwiCape Town Spurs. UMatuludi yena udlala kwiPolokwane City.
Omunye umdlali omusha uRodney Maphangule wePolokwane City, okwenza abadlali baleli qembu laseLimpopo babe bathathu.
Kukhona nomgadli osemncane kodwa othembisayo, uYanela Mbuthuma weRichards Bay.
Kwababuyayo kwiBafana, kukhona uSipho Mbule obolekiswe yiMamelodi Sundowns kwiSekhukhune United, uPercy Tau we-Al Ahly uSiyabonga Ngezana weFCSB noBongokuhle Hlongwane.
Ikhempu elandelayo yeBafana izoba ngasekuqaleni kukaNovemba njengoba izobhekana ne-Uganda ekuhambeni, bese ibhekana neSouth Sudan ekhaya.
Umdlalo we-Uganda uzoba ngoNovemba 15, kanti oweSouth Sudan, okuvela ukuthi uzoba seKapa, uzoba ngoNovemba 19.
