Uzwe kumenyezelwa enkundleni uyise ngokushona kukaZondi
Uyise womdlali weDurban City, uSinamandla Zondi, uLungisani Zondi uzwe ngoba sekumenyezelwa enkundleni ukuthi indodana yakhe seyishonile.
USinamandla Zondi ushone ngoLwesibili ntambama kulandela ukuquleka ngaphambi komdlalo weDurban City.
Kuvele ukuthi lo mdlali, obeneminyaka engu-22 ubudala, uquleke ngesikhathi iqembu lizivocavoca ngaphambi komdlalo neMilford FC.
Manje usihlalo weDurban City, uFarouk Kadodia useveze ukuthi bazamile ukucela ukuthi umdlalo ungaqhubeki ngemuva kwalesi sigameko.
Uthi ngemuva kokuwa kwakhe, uZondi bathole ukuthi akasakwazi ukuphefumula kahle, kwacaca ukuthi isimo sibucayi.
“UZondi uwe ngaphambi komdlalo kwathi uma abosizo lokuqala bebona ukuthi akaphefumuli, waphuthunyiswa esibhedlela,” kusho uKadodia kwiRadio 2000.
“Sibe sesicela kubaphathi bomdlalo ukuthi bengawuqalisi lo mdlalo kodwa bona baqhubeka nawo.
“Kuthe kusaphele imizuzu engu-18 umdlalo uqalile, sathola umbiko wokuthi useshonile.
“Sibe sesiphinda sicela konompempe ukuthi umdlalo awumiswe ngenxa yalo mshophi osuvelile, bathi bazobona ngesikhathi sekhefu.”
Uthe ngesikhathi sekhefu kube yima benquma ukuwumisa umdlalo, kanti ngalesi sikhathi bese kuphume nesimemezelo esazisa wonke umuntu obesenkundleni ngalo mshophi.
Ngeshwa, noyise kaSinamandla ubengomunye walabo njengoba ebekhona ukuzobuka indodana yakhe idlala.
“Sibonga ukuthi bawumisile umdlalo ngesikhathi sekhefu… Okubuhlungu wukuthi uyise ubekhona enkundleni.
“Uzwe ngoba sekumenyezelwa ngokwenzekile ukuthi indodana yakhe isishonile,” kuqhuba uKadodia.
Imininingwane yokufihlwa kukaZondi beyingakaqinisekiswa, kanti iPSL isikhiphe umyalelo wokuthi ahlonishwe ngaphambi kwayo yonke imidlalo yayo.
