ULorch usengabuya kwiBafana – Hugo Broos
- Sibongiseni GUMBI
UThembinkosi Lorch wagcina ngo-2022 ukudlala kwiBafana Bafana kodwa umqeqeshi, uHugo Broos uzithole ebuzwa ngalo mdlali kuleli sonto.
Lo mbuzo uqhamuke emhlanganweni nabezindaba ngoLwesine njengoba iBafana ilungiselela imidlalo yokuhlungela iCaf Africa Cup of Nations.
Izogadulisana neCongo-Brazzaville eNelson Mandela Bay Stadium ngoLwesihlanu ebusuku, bese iphinda nayo ekuhambeni ngoLwesibili.
“ULorch?,” kubuza uBroos ngokumangala. “Ukhuluma ngomdlali esamgcina eminyakeni emibili edlule.
“Ngicabanga ukuthi ngingabala abanye abadlali abayishumi ababenathi (kwiBafana) kodwa abangasekho manje.
“Ngaqala ukubumba kabusha leli qembu eminyakeni emithathu edlule,” kwengeza lo mqeqeshi ozikhulumelayo.
“Mhlawumbe kunzima kwabanye abadlali engababeka kodwa abangangenelisa…
“Kulungile-ke, ngabe sengibheka abanye. Futhi manje sekudlule iminyaka emibili kanti sengineqembu engilidingayo, elinomqondo ofanele, ikhwalithi nokunye.”
Yize esenawo umgogodla weqembu lakhe, uBroos uthi ngeke awuvale umnyango kubadlali aseke wasebenza nabo uma bebuyela efomini.
“Uyibonile imiphumela yethu yakamuva. Angisiboni-ke isidingo sokubuyela emuva, eminyakeni emibili edlule bese ngithi, ‘oh impela lona wayekhona naye’.
“Sesadlula lapho, akuseyona into esingayihlanganisa nemanje. Kodwa wonke umdlali unethuba lokuzosijoyina uma edlala kahle.
“Uma kusasa uLorch engagila izimanga kwiSundowns, nakanjani… Kungani singeke simbuyise azoba nathi? Kodwa asikho lapho namuhla.”
