Uhluleke kwiDowns neBucs, usefuna ukuyozama kwiChiefs

• Intatheli yeLISENETHINI

Isifiso sakhe esemncane kwakuwukuvelela kwelinye lamaqembu amakhulu ebholeni lakuleli uLesedi Kapinga. 

Ulitholile ithuba lokufeza leli phupho ngesikhathi esayinwa yiMamelodi Sundowns eminyakeni emihlanu edlule. 

Nokho izinto azimhambelanga kahle njengoba agcina eselizwa ngendaba ijezi, wagcina ecele ukukhululwa. 

Nebala iSundowns imdedelile ngaphambi kokuqala kwesizini edlule, wabe esethathwa yi-Orlando Pirates. 

Kodwa nakhona uzithole echitha isikhathi esiningi ebukela esebhentshini, kwesinye isikhathi abe sezihlweleni. 

Nakhona ube esebona ukuthi ngeke alithole ithuba lokuvelela, wacela ukudedelwa ayozama kwenye indawo. 

Ube esethathwa yiSekhukhune United okuyiyo adlala kuyo njengamanje, kodwa kuvela ukuthi inhliziyo isalangazalela ukubuyela eSoweto. 

Ngokubika kweSNL 24, uKapinga usefuan ukuyozama ukulifeza kwiChiefs iphupho lakhe lokuvelela eqenjini elikhulu. 

“ULesedi Kapinga ube neshwa kwiSundowns nePirates ngokweqiwa yijezi, kodwa lokho akusho ukuthi akayena umdlali osezingeni,” kucashunwe umthombo usho kanje. 

“Ulijabulele futhi uyalibonga ithuba alinikwe yiSekhukhune futhi ufuna ukulisebenzisa ukuveza ithalente lakhe. 

“Usayine inkintileka yonyaka ehambisana nombandela kowengeza omunye kanti ufuna ukuvuselela ibhola lakhe. 

“Wayenamathemba amakhulu okuvelela ngesikhathi esayina kwiSundowns, kodwa izinto azangahamba ngendlela ayefisa ngayo. 

“Wabe esethemba ukuthi ukuya kwiPirates kuzomnika lelo thuba. Kodwa engingakutshela khona wukuthi lo mfana uyayithanda iChiefs.

• OLUNYE UDABA: Okwenze uMiddendorp ajike emnyango kuMaZulu

“Uma lingavela ithuba lokuya kuyo, engaya egijima. Yilokho azokusebenzela manje njengoba esethole ithuba lokuzivuselela kwiChiefs.”