Ugeze igama uYusuf Maart ebuyisa iChiefs emdlalweni

Uwuqale ngebatha umdlalo uYusuf Maart ongukaputeni weKaizer Chiefs ngesikhathi ehlulwa yiphenathi.

IKaizer Chiefs ibekelwe iphenathi ngomzuzu ka-11 kulandela ukudlaliswa kabi kukaGlody Lilepo. 

Unompempe, uLuxolo Badi akazange angabaze ngesinqumo sakhe, wavele walikhomba emlotheni.

Yize zikhona kulo mdlalo izethenjwa ngamaphenathi, oMiguel Inacio noGaston Sirino, inikwe uYusuf Maart le phenathi.

Kuzokhumbuleka ke ukuthi lo mdlali wasesiswini uvele usenyamanambana kubalandeli baMakhosi abamsola ngokungabi sezingeni elifanele ukuhola leli qembu. 

Ube neshwa ke ibhola lakhe lizishayisa epalini yize belimhlulile unozinti we-Arrows u-Edward Maova.

I-Arrows ibe seyiwususa umhlola ekhaya, kwabe usezithintele kubalandeli uMaart.

Ngemuva kwalesi siqephu, ubethi uma ethinta ibhola abalandeli bamhhahhameze bekhombisa ukungayizwa indaba yakhe. 

Lokhu kubukeke kuzwela eqenjini, i-Arrows yaqala yaphakama kulo mdlalo, ihlanganisa iminyakazo emihle. 

Nokho abaqeqeshi beChiefs, uNasreddine Nabi nephini lakhe u-Ilyes Mxougi bebelokhu bebakhomoza abadlali babo.

Kuthe kusenjalo i-Arrows yagcina iyibhakuzisile inethi ngemuva kokufika kaningi kuzwakale epalini likaBruce Bvuma. 

UNduduzo Sibiya, obesehlulwe amathuba amahle kwaze kwakabili, uqedele kalula ibhola alibekelwe ngobuchule uKnox Mutizwa phambi kwepali. 

• FUNDA NALA | UKambindu ubheke ukusiza Usuthu lubuye nomgodla wamaphuzu

Nokho Amakhosi akwazile ukusheshe abuye kulo mdlalo, uMaart wageza igama enamathisela enethini ibhola elihle aliphakelwe uSirino ngomzuzu ka-29. 

UDillan Solomons ube nethuba lokubeka iChiefs phambili ka-41, kodwa wavele wakhahlela into ebheke entalashishi.

• SIBAMBE NAKU-FACEBOOK | Lisenethini.co.za

Lo mdlalo usekhefini njengamanje kanti zibambene ngo 1-1 kanti kubukeka esekhona amanye amagoli esiwombeni sesibili.