UGavin Lane uphawula ‘ngomuthi’ we-Orlando Pirates
Ingwazi ye-Orlando Pirates uGavin “Stability Unit” Lane isiphawule ngokusetshenziswa ‘komuthi’ ebholeni.
UGavin Lane unxuse i-Orlando Pirates ukuthi iqhubeke nemikhuba yayo yendabuko futhi ingawuyeki umuthi ikakhulukazi uma uyisebenzela.
Ukhuluma kanjena nje izimbangi zePirates kwiCaf Champions League, i-MC Alger isale ibabaza ngemuva komdlalo komlenze wokuqala.
Yakhala ngokuthi i-Orlando Pirates isebenzise into ethile ukuphazamisa iqembu layo.
Ekhuluma kwi-My Muti Story ku-KickOff, uGavin Lane ukhumbule ngezinsuku zakhe esadlala kule kilabhu yaseSoweto.
Uxoxe ngeziga ezazenzeka ngesikhathi iPirates ize igcina inqobe iChampions League ngo-1995.
Uthe yena uyakweseka konke okuyimikhuba namasiko okusetshenziswayo ebholeni lase-Afrika.
“Wonke amazwe, iqembu ngalinye lifuna ukusebenzisa umuthi walo, kodwa inkinga ukuthi amandla emithi awalingani,” kusho uLane.
“Amaqembu aseNyakatho Afrika anezinkolelo zawo – uthola umdlali efaka isokisi lakwesokunxele kuqala ngoba ekholelwa ukuthi lokho kunomthelela othile.
“Yize lokho kungewona umuthi, kodwa kungokuthile abakholelwa kukho bona.”
Ukuphawula kwakhe kuza ngemuva kokunqoba kwePirates ngo 1-0 emlenzeni wokuqala ihlulela iMC Alger ekhaya e-Algeria.
IMC Alger yaveza ukungajabuli kwayo ngePirates ngokuthi yahlala isikhathi esithile kwelinye lamapali ngaphambi komdlalo kukhona ekwenzayo.
Ngemuva kokuthi iPirates ibonakale ‘ithela okuthile’ lapho, izikhulu zeMC Alger zahamba zayothela amanzi abilayo.
La maqembu womabili azophinde ahlangane ngoLwesithathu e-Orlando Stadium ngo-6 ntambama.
UGavin Lane ukhumbule izikhathi ezishubile esadlala, okuhlanganisa nomdlalo owawuseNigeria.
Uthi kulowo mdlalo umdlali wasesiswini wePirates wangaleso sikhathi uHelman Mkhalele wajikijelwa ngokuthile okungaqondakali emhlane.
“UHelman wayezinwaya into ongayazi kangangokuthi umdlalo kwadingeka umiswe,” kukhumbula uStability Unit.
“Kwadingeka bamgeze umhlane futhi bamnike ijezi elisha. Kwakushube kangako.”
Uphinde waxoxa nangesigameko la naye acishe walwa nendoda eyayiphatha ikhubalo lePirates.
“Ngacishe ngamgingqa ngequpha ngemuva kokungishaya ngomsila wehhashi (ishoba).
“Wangishaya kabuhlungwana impela,” kusho uLane ehleka.
“Kodwa ngaleso sikhathi sasikholelwa kukho. Sasikwenza ngoba sifuna ukuwina futhi sikholwa ukuthi kuzosisiza.”
Uveze ukuthi abanye ozakwabo ngalesi sikhathi, njengo-Etienne Nsunda noJohn Moeti, baqale benqaba ukusebenzisa umuthi ngenxa yenkolo yabo.
Uthi kodwa bagcina begobile, bavuma ukwenza njengabo bonke ozakwazo eqenjini.
“IPirates kumele iqhubeke nokusebenzisa umuthi wayo. Akumele iyeke.
“Uma izimbangi zicabanga ukuthi uyasebenza, lokho phela kuhle kakhulu ngoba vele usuke uwusebenzisela ukuthi ukulekelele,” kusho uLane.
Njengoba amaBhakabhaka elungiselela umlenze wasekhaya, umyalezo kaLane ucacile: umuthi useyingxenye yesiko lePirates.
“Asambeni siyobashaya ngoLwesithathu. Abantu baseNyakatho Afrika kumele baphole futhi bayeke ukujikijela lezi zinto zabo ezivuthayo enkundleni.”
