UDove uvikela uNabi, kukhona angakwazi ukukusho
Umdlali wasemuva weKaizer Chiefs u-Edmilson Dove usevikele umqeqeshi wakhe uNasreddine Nabi.
UNasreddine Nabi ungaphansi kwengcindezi enkulu ngenxa yokungenzi kahle kwiBetway Premiership.
U-Edmilson Dove uthi asikho isidingo sokusola uNasreddine Nabi yedwa ngoba nabadlali kumele bathweswe icala ngokungahambi kahle kwezinto eqenjini.
“Eqenjini, sonke kufanele siziphendulele,” kusho u-Edmilson Dove kwiFARPost.
“Ekupheleni kosuku, umqeqeshi ukhona ukuze asinikeze noma yimaphi amathuluzi okuthi sisebenze.
“Kodwa sinomthwalo wokuthi thina sisebenze enkundleni.
“Ngakho, ngeke sisole uhlangothi olulodwa bese siyeka olunye ngoba siyiqembu.
“Sihlala sikhuluma ngobunye nokubumbana. Uma iqembu lihlulwa, sihlulwa sonke.
“Uma iqembu linqoba, sinqoba sonke. Kodwa kunezinto ezithile okungekho emandleni ami ukukhuluma ngazo.
“Kodwa ngicabanga ukuthi sonke sikulesi simo ndawonye. Kufanele siqhubeke nokubambana,” kwengeza umdlali wasemuva.
U-Edmilson Dove uthe nakuba kulula ukukhomba umuntu oyedwa uma kungahambi kahle, akumele kube njalo.
“Manje kulula kakhulu ukukhombana ngeminwe bese sithi umqeqeshi noma abadlali.
“Kodwa sonke sidinga isikhathi sokubeka imibono yethu endaweni futhi sisebenzise ifilosofi yethu,” kuqhuba lo mdlali odabuka eMozambique.
“Ngicabanga ukuthi ukwenze kahle lokho futhi mhlawumbe udinga nje isikhathi esengeziwe ukuze asebenze kulokho okudingeka asebenze ngakho nabadlali.
“Ngethemba ukuthi angaba ngumuntu obuyisela le kilabhu lapho ifanele ukuba khona,” kuqhuba yena.
IChiefs inomdlalo omkhulu ozokuba ngoMgqibelo njengoba izosingatha i-Orlando Pirates emdlalweni weligi eFNB Stadium.
