UCardoso uveza ukuthi iSundowns ibagobe kanjani abasePortugal
NguNjabulo Shezi
Inhloko yabaqeqeshi kwiMamelodi Sundowns, uMiguel Cardoso, isivule isifuba ngokuhehe abadlali abasha basePortugal, uNuno Santos noMiguel Risinho.
Laba badlali bajoyine leli qembu laseChloorkop ngaphambi kokuvalwa kwewindi lokusayinwa kwabadlali ngesonto elidlule.
IMamelodi Sundowns isazama ukuqhubeka nempilo kulandela ukushiywa yisilomo saseBrazil, uLucas Ribeiro ingazelele.
Isayinise laba badlali ababili basePortugal ngaphambi kokuvalwa kwewindi lokuhwebelana ngabadlali ngoMsombuluko odlule.
USantos ubonakale okokuqala enkundleni ngesikhathi iMamelodi Sundowns ibhekene neGolden Arrows eThekwini ngesonto eledlule.
Kulo mdlalo, abafana bakaCardoso bathole isibhaxu okokuqala kule sizini, kwashiya lo mdlali enemizwa exubene ngomdlalo wakhe wokuqala.
USantos, obedlalela iVitoria Guimaraes, uqokwe njengoMdlali oVelele ngoMgqibelo, ngesikhathi bexebula iRichards Bay ngo 4-1 emdlalweni weBetway Premiership eTshwane.
UReisinho yena bamthole bhusende njengoba ebehlukane neBoavista, umenyezelwe njengomdlali omusha weSundowns ngoLwesihlanu oludlule.
WINA | Ithuba lokuwina neVicks neLisenethini
Ekhuluma ngemuva komdlalo neRichards Bay, uCardoso uvule isifuba ngobunzima obuhambisana nenhlanhla obuholele ekutheni laba badlali – abachaze njengabohlobo oluphambili – baqome iSundowns.
“Ukwenzeka kwezinto eziningi ezahlukene ngesikhathi esifanayo yikhona okuholele ekutheni laba badlali bagcine kwiSundowns,” kusho uCardoso.
“Amaqembu afana neGuimaraes neBoavista athathwa njengamakhulu kodwa kwesinye isikhathi aficwa yizimo eziwaphoqayo ukuthi adayise abadlali njengoba kwenzekile ngoSantos.
“Ukuze iGumaraes iqondise amabhuku, ibidinga ukudedela abadlali abathile, kwaqondana nokuthi uSantos ufuna inselelo entsha empilweni yakhe.
“Noma ngingeke ngibakhulumele bobabili kodwa uSantos ngiyazi ukuthi waheheka ngesakwenza kwiFifa Club World Cup.
“Ngeke ngikuphike nokuthi ukufika kwabo bobabili kuxhumene nokuthi nami ngingumqeqeshi wasePortugal.”
FUNDA NALA | UMbuthuma uphawula ngamagoli akhe kwiBucs
Uthe ibhola laseNingizimu Afrika kumele lizgqaje ngokuheha abadlali balolu hlobo ngoba kusho ukuthi selikhule kakhulu.
“Kusemqoka nokho ukuthi abantu baseNingizimu Afrika bakuqonde ukuthi kunzima kangakanani ukuthi iligi yabo ihehe abadlali balolu hlobo.
“Sibe nenhlanhla kwaba khona okuqondanayo nathi sesilahle ithemba, wavuleka uphawini wokuthi sibathole.
“Sijabule kakhulu ngabo futhi asingabazi ukuthi bazokhathula indima ebonakalayo empumelelweni yeqembu,” kwengeza uCardoso.
