UBasadien uphendula ngokumataniswa ne‘Big 3’
Isihlabani seStellenbosch FC neBafana Bafana, uFawaaz Basadien, sesikhulume okokuqala ngamahlebezi asimatanisa namaqembu amakhulu abizwa nge‘Big 3’.
Lo mdlali odlala kwesokunxele emuva kubikwa ukuthi usohlwini lwabafunwa kwiMamelodi Sundowns, iKaizer Chiefs ne-Orlando Pirates.
UFawaaz Basadien, oneminyaka engu-28 ubudala, ube nesizini enhle kwiStellenbosch.
Udlale imidlalo engu-46, washaya amagoli ayisikhombisa, wakha ayisishiyagalombili kuyo yonke imiqhudelwano.
Usize leli qembu lafinyelela kweyandulela owamanqamu kwiCaf Confederation Cup. Bakhishwe yiSimba SC yaseTanzania.
KwiBetway Premiership, uFawaaz Basadien udlale indima ebalulekile njengoba iStellenbosch iqede endawei yesithathu.
Iqede isizini inamaphuzu angu-48 emidlalweni engu-28. Ihlulwe kowamanqamu kwiMTN8.
Lokhu kuqeda ngamandla kusho ukuthi izophinde idlale emiqhudelwaneni yeCaf nangesizini ezayo.
Lokhu kwenze uBasadien waba ngomunye wabadlali basemuva abathenjwayo kuleli, kodwa naphezu kwamahlebezi akhona, yena ugxile ekudlaleni.
Uthi into abeke kuyo umqondo wakhe yena wukuthuthukisa ukudlala kwakhe ukuze aqhubeke nokusiza iqembu lakhe.
“Kimina, okubalulekile njengamanje wukugxila kulokho engingakwazi ukukulawula,” kusho yena.
“Amahlebezi ayajabulisa, kodwa engigxile kakhulu kukho ukuqhubeka nokudlala nokuba ngcono nsuku zonke.”
UFawaaz Basadien nokho uvumile ukuthi naye unephupho lokudlalela ikilabhu enkulu.
“Wonke umdlali ufuna ukuzuza okwengeziwe futhi mhlawumbe ajoyine iqembu elikhulu,” kuqhuba yena.
“Kodwa kumayelana nesikhathi. Angijahile ukuhamba. Njengamanje, ngifuna ukugxila emdlalweni wami.”
Ukubeke kwacaca ukuthi nakuba intshisekelo ikhula, into ebaluleke kakhulu kuye yiStellenbosch.
“Ngingathanda ukuya kwelinye iqembu, iqiniso lelo. Kodwa umsebenzi wami ukuqhubeka ngidlale kahle kwiStellenbosch.”
Isimo senkontileka kaBasadien’s nekusasa lakhe kusazoqagulwa kakhulu ngakho, cishe kuze kube usayina kwelinye iqembu, noma kuvalwe iwindi.
Kodwa njengoba amaqembu aphezulu emzingela, kusengenzeka ashintshe iqembu ngaphambi kokuthi kuqale isizini entsha.
UFawaaz Basadien uzoba ngukapteni weBafana Bafana uma isibhekene neTanzania emdlalweni wobungani ngoLwesihlanu ebusuku.
