UCardoso usola onompempe ngokulimala kukaMokoena
Umqeqeshi weMamelodi Sundowns, u-Miguel Cardoso, akazange agxile kakhulu ekunqobeni kweqembu ngo 3-2 kwiTS Galaxy.
Esikhundleni salokho, ukukhathazeka kwakhe bekukumdlali wasesiswini uTeboho Mokoena, ophuthelwe yilo mdlalo ngenxa yokulimala.
UMokoena ulimale ngesikhathi iSundowns ibhekene nePolokwane City kwiMTN8 ngempelasonto edlule.
UGomolemo Kekana ungene esikhundleni sakhe njengoba aMasandawana ebebhekene neGalaxy eMbombela Stadium.
ISundowns igcine inqobe ngendlela emangalisayo, uSiphelele Mkhulise eshaya amagoli amabili sekusele imizuzu embalwa umdlalo uphele.
Kodwa u-Miguel Cardoso uthi ukulimala kukaMokoena kufanele kube yisifundo esibalulekile ebholeni laseNingizimu Afrika.
“UTeboho Mokoena ubengekho emdlalweni namuhla. Ngicabanga ukuthi kubalulekile ukuthi iNingizimu Afrika ivikele abadlali bayo,” kusho uCardoso.
Lo mqeqeshi ugxeke nesigameko esaphetha ngokulimala kukaMokoena,
Uthi umdlali wePolokwane City owabangela ukulimala akazange athole ngisho ikhadi eliphuzi.
UCardoso uphinde wathi bekunezinye izigameko eziningi ezingezinhle kulo mdlalo weMTN8.
Okwamanje, akukacaci ukuthi uMokoena uzobuyela nini ekudlalweni.
- FUNDA NALA | UKaze nomunyu ebuyela eFNB
ISundowns isalinde ukuhlolwa okuphelele ukuze kutholakale ubukhulu bokulimala kwakhe.
- EZISHISAYO| Cofa lapha usithole kuWhatsApp
