U-Itumeleng Khune uveza okumdumaza ngoBruce Bvuma
Ingwazi yeKaizer Chiefs u-Itumeleng Khune, isidalule ukuphoxeka kwayo ngoBruce Bvuma.
U-Itumeleng Khune uthi uBruce Bvuma wehlulekile ukulandela iseluleko esifanayo nesasiza uRonwen Williams ukuba abe kuleli zinga akulo.
UWilliams kumanje ungunozinti ohamba phambili e-Afrika, futhi nguye oyisethenjwa kwiBafana Bafana nakwiMamelodi Sundowns.
Ekhuluma ne-iDiski Times, uKhune ukhumbule iqhaza lakhe ekukhuliseni bobabili labo nozinti.
Usebenze noWilliams kwiBafana Bafana kanti uBvuma yena bebenaye kwiChiefs, bejima ndawonye nsuku zonke.
U-Itumeleng Khune uncome uWilliams ngokulambela impumelelo, ukuziphatha kwakhe nokulalela izeluleko zakhe.
“Ngenkathi uRonwen ejoyina iBafana, ngamtshela ukuthi, ‘asikho lapha ukuzowakha ubungani’.
“Ngamtshela ukuthi ‘silapha ukuzoqhudelana’. Walalela, uyambona manje ulaphi…
“Ungukapteni weBafana, uba yisimenywa esiqavile kwiBallon d’Or, futhi ungumdlali ophambili,” kusho uKhune.
UWilliams walalela uma uKhune emeluleka futhi emfakela inselelo. Waphokophela ukwenza ngcono futhi wagqama kwiSundowns nakwiBafana.
“Ngamtshela ukuthi singenza kangcono ngokufunda komunye nomunye. Wakuqonda lokho futhi wasebenza kanzima.”
Ngokuphambene, u-Itumeleng Khune uphoxekile ngendlela uBruce Bvuma enze ngayo.
“UBruce ube nethuba elifanayo. Ngazama ukumbonisa, kodwa akazange awathathele phezulu amazwi ami.
“Namanje akafikile ezingeni elimfanele, futhi lokho kuyamangaza ukukubona,” kuchaza uKhune.
Lo mdlali oneminyaka engu-37 ubudala ukholwa ukuthi uBvuma ubengalidla ijezi kwiChiefs nakwiBafana ukube ubevulelekile ekukhulisweni nguye.
“Wayecabanga ukuthi singabadlali beqembu elilodwa, ngakho mhlawumbe wayengakwazi ukungibona njengomeluleki kuye.
“Kodwa uRonwen, odlala kwenye ikilabhu, wathatha iseluleko sami wasisebenzisa.”
UKhune uphinde waveza ukuthi usakhuluma namanje noWilliams cishe nsukuzonke, bekhumbula izikhathi zabo bendawonye kwiBafana.
“Sichithe iminyaka engaphezu kuka-10 ndawonye kwiBafana,” kuqhuba uKhune.
“Wangitshela ukuti, ‘Ngifuna ukuba unombolo 1,’ futhi ngamtshela ukuthi kumele akusebenzele kanzima lokho.”
Manje njengoba engasekho kwiChiefs, umlando kaKhune akuwona nje owokuvimba kahle, — kodwa uyisifundo esibalulekile.
Ukuthi isizukulwane esiza ngemuva kwakhe siyasithatha yini lesisifundo noma cha, sekusele kuso.
