U-Azola Tshobeni uvalelise ngomlayezo onomunyu kwiPirates
Yize i-Orlando Pirates ingakakumemezeli ukuhamba kwakhe, u-Azola Tshobeni usevalelise ngomlayezo osuka enhliziyweni kuleli qembu.
Lo mdlali oneminyaka engu-23 ubudala ushiye ngokusemthethweni i-Orlando Pirates ngemuva kweminyaka eyisishiyagalolunye ekule kilabhu.
Ufike kuyo esengumfanyana omncane, wakhulela ezinhlakeni zayo ezehlukene zokuthuthukisa amakhono ngaphambi kokukhuphukela eqenjini elikhulu.
Nokho ukuthole kunzima ukuzitholela indawo eqenjini elikhulu njengoba edlale imidlalo embalwa kule minyaka emithathu edlule njengoba manje eseshiyile nje.
Yize esejoyine iChippa United – nayo engakakuqinisekisi ukusayinwa kwakhe – yena useveze ukuthi uzohlezi eyiBhakabhaka impilo yakhe yonke.
Inkampani emphethe, iP Management Sport, ikuqinisekisile ukuthi ukuhamba kwakhe kwiPirates okonomphela hhayi ukubolekiswa.
Bekunenkolelo yokuthi u-Azola Tshobeni uyingxenye yeqeqebana labadlali i-Orlando Pirates ebabolekise kwiChilli Boys.
UTshobeni uvalelise ngokusemthethweni ngomlayezo onamandla awufake kwi-Instagram wakhe kuleli sonto eveza uthando analo lwamaBhakabhaka.
“Le kilabhu ingikhulisile,” ubhale kanje. “Ingenze ngaba yile ndoda engiyiyo namuhla.”
Ube kwiPirates iminyaka eyisishiyagalolunye futhi unezinkumbulo eziningi ezinhle ngesikhathi sakhe kuyo.
“Bekungesona isinqumo esilula, kodwa kubonakala kuyisikhathi esifanele,” kwengeza uTshobeni.
Ubonge usihlalo, u-Irvin Khoza, abaqeqeshi, ozakwabo kanye neGhost Nation (abalandeli be-Orlando Pirates).
“Kini nonke… nibe yingxenye yalolu hambo, futhi isikhathi sindawonye sizohlezi sisenhliziyweni kimi kuze kube phakade,” kuqhuba yena.
Uyaziqhenya, ugcwele ukubonga, futhi uselungele isahluko esilandelayo somsebenzi wakhe webhola.
“Njengoba lesi sahluko besisihle kimi, sekuyisikhathi sokuthi ngamukele izinselelo ezintsha futhi ngifeze lokho engikholwa wukuthi ngikudalelwe,” kusho yena.
U-Azola Tshobeni ube eseyivala ngendlela ezobajabulisa abalandeli, ibenze babone ukuthi ubethembekile eqenjini labo futhi uyohlezi eyingxenye yalo noma engasekho kulo.
“Igazi lami libomvu, isikhumba sami simnyama, amathambo ami amhlophe. Once Always.”
UTshobeni akenzanga njengoThabiso Monyane obenguzakwabo kwiPirates kodwa manje osekwiKaizer Choefs.
UMonyane akazange avalelise, kodwa wezwakala esencoma ubumnandi bokuba yiKhosi for Life ngale kwamakhelwane.
